АТГ, ЭЦГ-аас үерийн далан, нийтийн эзэмшлийн газарт олгогдсон газар, барилгуудыг шалгаж эхэллээ

Сэлбэ голын ус хальж, үерлэхэд хамгийн их нөлөөлж байгаа зүйл нь эрэг дагуух барилга, орон сууцны хорооллууд гэдгийг УОК, НОК-ийн удирдлагууд хэлж буй. Энэ дагуу Ерөнхий сайд Л.Оюун-Эрдэнэ  өчигдөр /2023.07.06/  нийслэлд дэх үерийн нөхцөл байдалтай зарим байршилд ажилласан билээ.

 Энэ үеэр тэрбээр НОК, УОК-ын удирдлагуудад үер усны далан, суваг, шуудуу хааж газар олгосон, барилга барьсан, холбогдох зөвшөөрөл олгосон албан тушаалтнуудыг АТГ болон холбогдох хууль, хяналтын байгууллагад яаралтай өгч шалгуулах, шаардлагатай тохиолдолд барилгыг нураах хүртэл арга хэмжээ авах зэрэг үүрэг, даалгавар өгсөн. 

Энэ дагуу үерийн далан, нийтийн эзэмшлийн газар олгогдсон газар, баригдсан барилгуудыг АТГ болон ЭЦГ-аас шалгаж эхэлжээ. Мөн Ерөнхий сайд энэ сарын 15 гэхэд газрын талаарх бүх мэдээллийг www.shilen.gov.mn цахим хуудсанд байршуулахыг үүрэг болгосон байна.