ЦЕГ: Ерөнхийлөгчийн зургаар хошигнол хийсэн залууг худал мэдээлэл тараасан хэргээр шалгаж байна

ЦЕГ-аас Ерөнхийлөгч У.Хүрэлсүхийн зургаар хошигнол хийсэн залууг шалгаж байгаа талаар дараах мэдээллийг өглөө.

Тодруулбал, "Эрүүгийн хэрэг хянан шийдвэрлэх тухай хуулийн 30.2 дугаар зүйлд мөрдөгч гэмт хэргийн шинжийг өөрөө шууд илрүүлсэн тохиолдолд гэмт хэргийн талаарх гомдол, мэдээллийг шалгах талаар заасан. Эрүүгийн цагдаагийн албанаас Эрүүгийн хэрэг хянан шийдвэрлэх тухай хуульд заасан үүргийн дагуу иргэн "Б" нарын олон нийтийн цахим сүлжээнд нийтэлсэн мэдээллийн агуулга нь хүний нэр төр, алдар хүндэд халдсан гэмт хэргийн шинжтэй байж болзошгүй үндэслэлээр гомдол, мэдээллийн бүртгэлд аван хойшлуулшгүй ажиллагаа явуулж байна. Мөн худал мэдээлэл тараах буюу хүний нэр төр, алдар хүнд, хуулийн этгээдийн ажил хэргийн нэр хүндэд халдсан илт худал мэдээллийг олон нийтэд тараасан бол дөрвөн зуун тавин нэгжээс нэг мянга гурван зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ" гэх мэдээллийг гаргасан байна.

Үертэй холбоотой цахим орчинд өөрийн үзэл бодлоо илэрхийлсэн залууг Цагдаагийн байгууллагаас дуудаж таван цагийн турш мэдүүлэг авсан юм.