Б.Мөнхтамир: Орон нутгийн нислэгтээ бид хамгийн байж болох хямд үнийг баримтална

Монгол Улсын Засгийн газраас 2023-2025 оныг “Монголд зочлох жил” болгон зарласантай холбогдуулан орон нутгийн нислэгийг сэргээх, үнэ тарифыг бууруулах, аялал, жуулчлалыг дэмжих зорилгоор “МИАТ” ТӨХК Улаанбаатар хотоос орон нутгийн есөн чиглэлд өнөөдрөөс хуваарьт нислэг үйлдэж эхэллээ.

Чойбалсан, Даланзадгад, Мөрөн, Улиастай, Алтай, Ховд, Улаангом, Өлгий гэсэн 9 чиглэлд долоо хоногт 1-2 давтамжтай ниснэ, орон нутгийн тариф 40-68 хүртэл хувиар буурна.

 МИАТ ТӨХК-ийн гүйцэтгэх захирал Б.Мөнхтамир "Өнөөдрөөс есөн аймгийн хуваарьт нислэгийг эхлүүлж байна.   МИАТ компани 1996 оноос хойш 2008 он хүртэл бүх аймаг руу нислэг үйлддэг байсан. 

Сүүлийн үед орон нутгийн нислэгийн үнэ гадагшаа нисэж буй үнэтэй  адилхан болсон. Үүнтэй холбогдуулан Засгийн газраас орон нутгийн нислэгийг хямд бөгөөд хүртээмжтэй байлгахаар зорьсон. Бид орон нутагт нисэж эхэлснээр бусад авиа компаниудын нислэгээс 2-2.5 дахин хямдарч байна. Ингэснээр өрсөлдөөнийг бий болгож, дагаад авиа компаниуд үнээ буулгана гэж найдаж байна" гэлээ. 

 Баян-Өлгий аймаг руу зорчих нэг зорчигчийн хоёр талын нислэгийн тийз өнөөгийн тарифаар 1.6 гаруй сая төгрөг байгаа бол хоёр талдаа 800 мянган төгрөг болж буурах юм. Ховд, Увс аймаг руу зорчиход 1.6 сая төгрөг зарцуулдаг бол хоёр талдаа 600-650 мянган төгрөгөөр зорчдог болох нь.

Дээрх чиглэлд долоо хоногтоо хоёр удаа нислэг үйлдэх юм.