С.Бямбацогт: Төмөр замчдынхаа цалинг үе шаттайгаар нэмэгдүүлнэ

“Улаанбаатар төмөр зам” ХНН-ийг авлигад хаалттай харин ажилтнууддаа ээлтэй байгууллага байлгах чиглэлээр өнгөрөгч хугацаанд салбарын сайд С.Бямбацогт анхаарч ажиллаж байгаа тухайгаа мэдэгдэж байсан. Тэгвэл өнгөрөгч онд төмөр замчдын үр дүнгийн урамшууллыг 100 биш 200 хувиар олгох чиглэл өгч хэрэгжүүлсэн бол энэ удаагийн ОХУ-д хийж буй айлчлалын үеэр ажилтнуудын цалинг нэмэгдүүлэхээр болсон байна.

“РЖД" НХН-ийн ерөнхий захирал, "УБТЗ" ХНН-ийн хувь нийлүүлэгчийн эрхийг хэрэгжүүлэгч О.В.Белозёровтой уулзах үеэрээ Зам, тээврийн хөгжлийн сайд С.Бямбацогт “Өнгөрсөн онтой харьцуулахад ачаа тээвэр 26 хувиар, транзит тээвэр 50 хувиар нэмэгдсэн. Цаашид зүтгүүр нэмчихвэл тээвэрлэлтээ нэмэх боломжтой. 2023 онд 36 сая.тонн ачаа тээвэрлэх боломжтой гэж харж байна. Түүнээс гадна УБТЗ-ын ажилчдынхаа нийгмийн асуудлыг шийдвэрлэх, цалин нэмэх зорилт тавьж байна. Сүүлийн жилүүдэд ард иргэдийн орлого буурч, бараа бүтээгдэхүүний үнэ өссөн. 

УИХ-аас цалин, тэтгэврийг инфляцтай уялдуулан нэмэх шийдвэр гаргасан. Манай салбарт төмөр замын олон компани бий боллоо. Тэдгээрийн цалин УБТЗ-аас өндөр тул боловсон хүчнээ алдах тохиолдол их гарч байна” гэсэн байна.

Уулзалтын үеэр талууд тохирлцон бэлтгэгдсэн, мэргэшсэн боловсон хүчнээ хадгалах, ажилчдын нийгмийн асуудлыг шийдвэрлэх, сахилга хариуцлагыг сайжруулах зорилгоор Үйлдвэрчний эвлэлтэй байгуулсан хамтын гэрээ, байгууллагын орлого, ашигтай уялдуулж ажиллагсдын цалинг үе шаттайгаар нэмэгдүүлэхээр болсон байна.