Сүм хийд, шашны байгууллагуудад хяналт шалгалт хийж эхэлжээ

Олон нийтийн сүлжээгээр "Хийдэд шавилан суралцаж буй хүүхдүүд бэлгийн дарамтад өртдөг үү” гэх мэдээлэл тархаад буй. Тус мэдээллийн дагуу Баянгол дүүргийн цагдаагийн газраас Эрүүгийн хуулийн 12.1 дүгээр зүйлд заасан гэмт хэргийн шинжтэй гомдол, мэдээллийн бүртгэлд бүртгэн авч, мөрдөн шалгах ажиллагаа явуулж эхлээд байгаа билээ.

Тэгвэл ирэх долоо хоногоос ХЭҮК-ын Хүүхэд хүчирхийллийн эсрэг үндэсний хөдөлгөөнөөс Гандантэгчэнлин хийдэд шалгалт оруулахаар болсон гэх мэдээлэл бий.

Уг асуудалтай холбоотойгоор  Сонгинохайрхан дүүргийн хэмжээнд  ИТХ, Цагдаагийн газар,Татварын хэлтэс, Нийгмийн даатгалын хэлтэс манай хэлтсээс бүрдсэн ажлын хэсэг дүүргийн нутаг дэвсгэрт үйл ажиллагаа явуулдаг Сүм хийд, шашны нийт байгууллагуудаас 20 байгууллагын үйл ажиллагаанд хяналт, шалгалтын ажил зохион байгуулж байна. Тус хяналт шалгалт маргааш мөн үргэлжилнэ хэмээн  Сонгинохайрхан дүүрэг Гэр бүл, Хүүхэд, Залуучуудын хөгжлийн хэлтэсээс мэдээллэв.