ОХУ-ын Сибирийн Хууль сахиулах гаалийн газар, Алс Дорнодын Хууль сахиулах гаалийн газартай уулзалт хийлээ

Улсын хилээр хууль бусаар эд зүйл нэвтрүүлэх явдалтай тэмцэх болон хууль сахиулах чиглэлээр хил орчмын бүс нутагт хамтран ажиллах асуудлаар Монгол Улсын ГЕГ-ын Зөрчилтэй тэмцэх, аюулгүй байдлын газраас ОХУ-ын Сибирийн Хууль сахиулах гаалийн газар, Алс Дорнодын Хууль сахиулах гаалийн газартай уулзалт хийсэн байна. 

Хамтарсан 6-р ээлжит уулзалтыг ОХУ-ын Красноярск хотноо энэ оны 6 дугаар сарын 5-аас 8-ны өдрүүдэд зохион байгуулжээ.

Уулзалтаар талууд 2022 онд хууль сахиулах чиглэлээр байгуулсан Протоколын хүрээнд өнгөрсөн хугацаанд хийгдсэн ажлын үр дүнг хоёр талаас дүгнэн хэлэлцэж, харилцан тохиролцож, төлөвлөгөөний хэрэгжилт үр дүнтэй байгааг цохон тэмдэглэсэн байна.

Мөн талууд үндэстэн дамнасан гэмт хэрэг, гаалийн зөрчлийн талаар шуурхай мэдээлэл солилцоог цаашид сунгах талаар тохиролцсоны зэрэгцээ галт зэвсэг адил хэрэгсэл болон хар тамхи, мансууруулах бодис, түүний хууль бус эргэлттэй тэмцэх, таслан зогсоох чиглэлээр бүх талаар хамтран ажиллахаар харилцан тохиролцжээ. Монголын төлөөлөгчид Сибирийн бүс нутгийн цахим гаалийн үйл ажиллагаатай танилцаж, бүрдүүлэлтийн нэгдсэн системийн чиглэлээр туршлага хуваалцжээ.