Орон нутагт хамгийн анхны “Смарт Эрдэнэт” платформыг Орхон аймаг ашиглалтад орууллаа

Орхон аймаг иргэддээ болон  аймаг орон нутагтаа зочлон ирсэн, ирэхээр зорьж буй хүн бүхэнд зориулсан гар утасны аппликейшнийг  хэрэглээнд нэвтрүүлж өнөөдөр нээлтээ хийлээ.

E-Mongolia  буюу төрийн цахим үйлчилгээний нэгдсэн системийн дэд систем байдлаар орон нутгийн бүхий л үйлчилгээг нэг дор багтаажээ.   “Смарт Эрдэнэт” цахим платформ нь Орхон аймагт хэрэгжиж буй “Цахим Эрдэнэт” хөтөлбөрийн хүрээнд хийгдэх 17 ажлын нэг нь аж.

Аймгийн Засаг дарга С.Батжаргал аппликейшныг танилцуулж, Орхончуудын өдөр тутмын хэрэглээнд нэвтэрч байгааг дуулгасан юм.

Тэрээр “Смарт Эрдэнэт” аппликейшн хэрэглэгдэх л ёстой. Тийм ч ураас хүний өдөр тутамдаа хэрэглэдэг, хэрэгцээтэй зүйлсийг  энэхүү аппликейшнд суулгаж өгсөн. Аппликейнш маань өнөөдөр нээлтээ хийлээ. Үүнийг АЙ-ТИ технологийн компаниуд, Эрдэнэтийн залуучууд түүчээлэн аваад явна гэдэгт итгэл дүүрэн  байна. Цэс болгон нь  “амьтай”  байж, хүн бүр хэрэглэж хэвшсэн аппликейшн болно гэдэгт итгэлтэй байна” гэлээ.

Тус аппликейшин нь одоогийн байдлаар төрийн болоод иргэд, аж ахуйн нэгж бизнес эрхлэгчдэд чиглэсэн 10 гаруй төрлийн цэс багтсан байна. Тухайлбал: Орхон аймаг, Эрдэнэт хотод зочилж буй бүхэнд зориулсан Аялал жуулчлалын  цэс, Эрүүл мэндийн бүх мэдээлэл цаг авалт, төрийн байгууллагын цогц мэдээлэл, Такси үйлчилгээ зэрэг цэснүүд багтсан ажээ.

Түүнчлэн бизнес эрхлэгчид бүгд онлайн шоп, эсвэл нэмэлт аппликэйшнийг 10-100 сая төгрөг зарцуулан хөгжүүлэх боломжгүй тул энэхүү цэсээр дамжуулан үйл ажиллагаагаа тэлэх боломжийг бүрдүүлэн өгч байна.