Хэнтий аймаг төрөөс зээл авсан ''Найдваргүй'' зээлдэгчдийн нэрсийг ил болгож эхэллээ

Монгол Улсын Засгийн газраас хэрэгжүүлж буй 5Ш ажиллагааны хүрээнд Хэнтий аймаг төрөөс олгодог зээлийг ил тод болгох ажлыг эхлүүллээ. Тодруулбал Хэрлэн сумын Сум хөгжүүлэх сан нь анх 2011 он, ЖДБДСан нь 2009 оноос тус тус зээл олгож эхэлсэн. Дээрх хугацаанд зээл авсан иргэдээс нийт 352 иргэн, ААН 1,1 тэрбум гаруй төгрөгийн зээл авч эргэн төлөлт хийлгүй, найдваргүй зээлдэгчийн ангилалд орсон байна. Тиймээс Хэрлэн сумын Засаг даргын санаачилгаар эдгээр иргэдийн нэрсийг ил болгож, олон нийтийн цахим сүлжээнд байршуулж эхэллээ. Цаашид аймгийн Засаг дарга Ц.Чогсомжавын зүгээс бусад сумдад байгаа найдваргүй зээлдэгчдийг нэрсийг ил тод зарлах, нэмэлтээр олгож байгаа зээлийг нээлттэйгээр сонгон шалгаруулах бодлого барин ажиллаж байна.
Жишээлбэл өнгөрсөн жилээс эхлэн Хөдөлмөр халамжийн үйлчилгээний газраас аж ахуй эрхлэгчдэд олгодог зээлийн сонгон шалгаруулалтыг “Шарк танк” нэвтрүүлгээс санаа авч ил тод явуулсан бол энэхүү санаачилга нь улсын хэмжээнд жишиг болж энэ жилээс 21 аймагт хэрэгжиж эхэлжээ.