Сэрэмжлүүлэг: Долоон настай хүүхэд усанд живж, энджээ

Аялал зугаалгын улирал эхэлж, усанд осолдсон дуудлага нэмэгджээ. Тодруулбал Баян-Өлгий аймаг, Бугат сумын 3 дугаар багийн “Хасбаатарын хөшөө" гэдэг газарт зугаалж явсан зургаан хүний нэг нь Ховд голын усанд живжээ. Тус аймгийн Онцгой байдлын газрын Эрэн хайх, аврах бүлгийн алба хаагчид, Зэвсэгт хүчний 331 дүгээр ангийн алба хаагчид, ар гэрийнхэн нь хамтран 26 настай эрэгтэйг 06 дугаар сарын 12-ны өдрийн 07:00-22:25 цаг хүртэл эрэн хайсан ч олоогүй байна. Эрэн хайх ажиллагааг өнөөдөр өглөөний 07:00 цагаас дахин эхэлжээ. 

 Мөн Хөвсгөл аймаг, Бүрэнтогтох сумын нутагт Дэлгэрмөрөнд өсвөр насны хүүхэд энджээ. Тус аймгийн Онцгой байдлын газрын Эрэн хайх, аврах салбарын алба хаагчид, ар гэрийнхэн нийт 20 хүн, 4 автомашин, 1 завьтайгаар  7 настай, эрэгтэй хүүхдийг эрэн хайсан ч олоогүй байна. Нийт 20 удаагийн шумбалт хийсэн боловч үр дүнд хүрээгүй тул ар гэрийнхэнтэй нь зөвшилцөж, эрэн хайх ажиллагааг түр зогсоосон байна.