Тодруулга: Орон нутагт төлөг 60.000-100.000 төгрөгийн ханштай байна

Манай сурвалжлах баг энэ долоо хоногт "Хүчит" шонхор захаас махны үнийг сурвалжлахад, өнгөрсөн долоо хоногтой харьцуулахад хонины ястай махны үнэ 1.5 хувиар, хонины цул махны үнэ 1.4 хувиар тус тус өссөн байв. 

Тодруулбал, үхрийн цул мах нэг килограмм нь дунджаар 22264 төгрөг, үхрийн ястай мах нэг килограмм нь дунджаар 20104 төгрөгийн үнээр борлуулагдаж байна. Тэгвэл “Номин” супермаркет 17499 төгрөг, харин “Их наяд” худалдааны төвд 23800 төгрөг байгаа бол  “Хархорин” худалдааны төвд  14500 төгрөгөөр, “Саруул” худалдааны төвд 20800 төгрөгөөр тус тус худалдаалж байна. 

Зах, худалдааны төвүүдэд махны үнэ дээрх үнээр борлуулагдаж байгаа бол малчны хотонд  эр хонь, эм хонь, төлөг, эр ямаа, эм ямаа ямар ханштай байгааг Сүхбаатар, Хөвсгөл, Дундговь, Баянхонгор аймгуудын нэг нэг сумдаас малын ханшийг тодрууллаа. Энэ нь малчид дараах үнээр малаа худалдаж байгаа гэсэн үг юм. 

Сүхбаатар аймгийн Онгон суманд малын ханш ямар байгааг бид тус сумын Засаг дарга Э.Мөнхбатаас тодрууллаа.

Энэ жил Онгон суманд өвөлжилт хүнд байлаа. Манай сум 389 мянган тоо толгой малтай үүнээс 100 мянга гаруй мянган мал хорогдоод байна. Хаваржилт хүнд байсан тул малын тарга тэвээр муу байгаа. Өнөөдрийн ханшаар Төлөг-60.000, Эм хонь-80.000, Эр хонь-140.000, эм ямаа-60,000 эр ямаа-90.000, эр үхэр-1.1сая, бяруу-400.000 төгрөгийн ханштай байна. 

Дундговь аймгийн Баянжаргалан сумын махны ченж Б.Эрдэнэбаатар

Үнэ бол тарга  тэвээрээс шалтгаалж байна.Төлөг-70.000-80.000, эр хонь-130.000-200.000, эм хонь-100.000-200.000,  эм ямаа-60.000-70.000, эр ямаа- 150.000 төгрөгийн ханштай байгаа аж.

Баянхонгор аймгийн Баян-Овоо сумын ЗДТГ-ын Санхүүгийн албаны дарга Д.Эрдэнэбулган

Суманд мал худалдаж авах ченж ховор байдаг. Малчид ихэвчлэн аймгийн төвдөө малын махаа борлуулдаг. Суманд өнөөдрийн ханшаар Төлөг-100.000, Эр хонь-250.000-300.000, Эм хонь-120.000-140.000, эр ямаа- 180.000, эм ямаа-120.000 төгрөгийн ханштай байна.

Хөвсгөл аймгийн Бүрэнтогтох сумын ЗДТГ-ын хөдөө аж ахуйн мэргэжилтэн Б.Пүрэвдорж

Төлөг-100.000, эр хонь-200.000-250.000, эм хонь-100.000-120.000, эр ямаа-100.000-130.000, эм ямаа-60.000-80.000 төгрөгийн ханштай байна.