Ж.Сүхбаатар: Парламентад эмэгтэйчүүдийн төлөөлөл 40 хүртэлх хувьд байх ёстой

Төрийн байгуулалтын байнгын хорооны хурлаар Улсын Их Хурлын сонгуулийн тухай хуульд нэмэлт өөрчлөлт оруулах тухай хуулийн нэгтгэсэн төслийн анхны хэлэлцүүлгийг хийлээ. Энэ үеэр УИХ-ын гишүүн Ж.Сүхбаатар үг хэллээ. Тэрбээр: 
Монгол Улс 2005 онд түүхэндээ анх удаа эмэгтэйчүүдийг сонгуульд нэр дэвшүүлэх квотыг санаачилж улмаар 30 хувиар Сонгуулийн тухай хуульдаа тусгаж байлаа. Улмаар 2007 оны Сонгуулийн тухай хуулийн нэмэлт өөрчлөлтөөр дээрх ардчилсан үзэл баримтлалаасаа ухарч квотын заалтыг хасаж байв. Яг энэ үеэс л улс төрд, тэр тусмаа шийдвэр гаргах түвшинд эмэгтэйчүүдийн оролцоог хангая гэх байр суурийг Миний бие илэрхийлсээр ирсэн. Улмаар 2008 оны сонгуулиар УИХ-д 3 эмэгтэй гишүүн сонгогдож, 2012 оны парламентад 20 хувийн квот дэмжигдсэн юм. Ингээд холимог тогтолцоотой сонгууль зохион байгуулснаар 11 эмэгтэй сонгогдож, түүхэн дээд үзүүлэлтийг тогтоосон байдаг.

 
Харин энэ удаад Сонгуулийн тухай хуулийн 20 хувийн квотыг 40 хувьд хүргэх тухай хөндлөө. “Яагаад тэгш эрх чухал вэ?” гэх үндэслэлээ хамгаалж, тайлбарласан ч хараахан дэмжигдсэнгүй.
Монгол Улсын хүн амын 50.7 хувийг эзэлдэг эмэгтэйчүүдийн төлөөлөл парламентад 40 хүртэлх хувьд байх ёстой. Энэ бол эрчүүд эрх мэдэл, байр сууриа алдах тухай асуудал биш хөгжлийн асуудал гэдгийг сануулсаар ирсэн билээ.