​ Х.Баттулгын зөвлөхийн “Шинэ яармаг цогцолбор”-ын үл хөдлөхийг Хөгжлийн банкнаас борлуулж эхэлжээ

Экс ерөнхийлөгч Х.Батттулгын зөвлөх асан Ц.Ууганбаярын “Шинэ яармаг цогцолбор” төслийн 41 орон сууц, 332 авто зогсоол, баригдаж дуусаагүй 7 блок орон сууц, 16 авто зогсоол болон үйлчилгээний зориулалттай байр газрын хамт Хөгжлийн банкны өмчлөлд шилжсэн байна. Ингэснээр Хөгжлийн банк тус обьектуудыг борлуулах үйл ажиллагаа эхлүүлжээ. Эргэн сануулахад, "Нью яармаг хаусинг прожект" ХХК "Шинэ Яармаг" орон сууцны цогцолбор хороолол барих төсөл хэрэгжүүлэхээр Хөгжлийн банкнаас 142 тэрбум төгрөгийн зээл авсан байдаг. Үүнээс 59 тэрбум төгрөгийн өрийг барагдуулж, 117 тэрбум төгрөгийн зээлийн үлдэгдэлтэй байсан юм.
Дашрамд дурдахад, Хөгжлийн банканд 2022 оны 1 дүгээр сарын 20-ны өдрөөс хойш өнөөдрийг хүртэлх хугацаанд 1,3 их наяд төгрөгийн зээлийн эргэн төлөлт хийгдсэн байна. Мөн чанаргүй зээлийн эргэн төлөлтийн хүрээнд шүүхийн шийдвэрийн дагуу банкны өмчлөх бусад үл хөдлөх хөрөнгийн хэмжээ 2023 оны тавдугаар сарын байдлаар 270.8 тэрбум төгрөг байгаа юм.