"Хурд" хамтлагийн 30 жилийн ойн тоглолтын дууны найруулга дээр гадны инженерүүд ажиллана

2023 оны зургаадугаар сарын 10-нд Төв цэнгэлдэх хүрээлэнд “Хурд - Түүхт 30 жил" тоглолт болно. Тоглолтын Ерөнхий найруулгыг On'n Off продакшн гүйцэтгэж, Ерөнхий продюсер, найруулагчаар Соёлын гавьяат зүтгэлтэн С.Ононбат ажиллаж байна. Тоглолтын дууны найруулга дээр ажиллахаар Герман, Францын мэргэжлийн алдартай дууны инженерүүд хүрэлцэн ирэхээр болсон тухай мэдээллийг бид онцлон хүргэж байна.

“Хурд” хамтлаг 30 жилийн ойн тоглолтдоо Монголын ард түмний дунд амнаас ам дамжин, үеэс үед хоногшин, домог болон эгшиглэж, дуулагдаж, гэгээрүүлж ирсэн “Цэргийн бодол”, “Эх орон”, “Хамаг Монгол”, “Аавдаа би хайртай”, “Ээждээ”, “Чи минь байгаа болохоор”, “Хайрын улаан сарнай, “Эндүүрэл” зэрэг бүх цаг үеийн шилдэг дуунуудаа дуулахаас гадна рок, попын олон хамтлаг, дуучид тоглолтод оролцож, мэндчилгээ дэвшүүлнэ.