Д.Сарангэрэл: Сайд Х.Булгантуяа балай юм ярьж байна лээ

 Төрийн албан хаагчдын цалин хөлсийг нэмэгдүүлэхээр Засгийн газраас шийдвэрлэсэ.  Энэ ажлын хүрээнд Боловсрол, шинжлэх ухаан, эрүүл мэнд, соёл, урлаг, спортын салбарын төрийн үйлчилгээний албан хаагчдыг “Төрийн мэргэжлийн үйлчилгээ”-ний нэгдсэн ангилал, зэрэглэлээр цалинжуулна.

Ирэх долдугаар сарын 1-нээс эхлэн соёл урлаг, биеийн тамир, спортын салбарын цалингийн доод хэмжээг 590 мянган төгрөг байгааг 1.0 сая төгрөг болгож, төрийн нийтлэг үйлчилгээний албан хаагчдын цалингийн доод хэмжээ 565 мянган төгрөг байгааг 750 мянган төгрөг болгохоор төсвийн тодотголын саналд санал оруулсан.

Түүнчлэн нийслэл, орон нутаг, яам, агентлагийн төрийн захиргааны албан хаагчдын үндсэн цалинг нэгдсэн сүлжээгээр зохицуулж, ижил зэрэглэлд хамаарах төрийн тусгай албан хаагчдын үндсэн цалинг адил болгоно.

Төрийн нийтлэг үйлчилгээний 58.9 мянга, соёл урлаг, биеийн тамир, спортын 2.6 мянга, төрийн захиргааны 23.0 мянга, төрийн тусгай 35.0 мянга, төрийн мэргэжлийн үйлчилгээний 93.2 мянга, төрийн нийтлэг үйлчилгээний 58.9 мянга, төрийн улс төрийн 3.8 мянга, нийт 213.9 мянган төрийн албан хаагчийн цалин 10-50 хувиар нэмэгдэнэ. 

Уг асуудалдтай холбогдуулан энэ Лхагва гаригийн чуулганы нэгдсэн хуралдааны үеэр УИХ-ын гишүүн Д.Сарангэрэл дараах байр суурийг илэрхийллээ. 

Тэрбээр " Х.Булгантуяа сайд соёлын салбарын ажилчдын цалинг эрүүл мэндийн салбарынхантай дүйцүүлнэ гэж балай юм ярьж байна лээ. Эрүүл мэндийн салбарын эмч, сувилагч нарын ажлын онцлог, мэргэжлийн эрсдэл нөхцөлтэй холбоотой байдаг юм. Гэтэл соёл урлагийн салбарынхантай тэгштгэнэ гэсэн ойлголт хэрхэвч байхгүй шүү. Энэ асуудлыг Засгийн газар анхааралдаа авна биз ээ" гэв.