Бид ШШГЕГ-ын харьяа Хорих 407-р нээлттэй, хаалттай ангийг зорьлоо. Энэ анги бол эмэгтэйчүүдийн хорих анги. Эрхээ хасуулж буй эмэгтэйчүүдээс ярилцлага авахын тулд Хорих анги руу урьдчилан албан бичгээр хүсэлт өгч, мэдээлэл авах боломжтой гэсэн тул ийнхүү зорьж байгаа нь энэ. Хорих ангийн хаалгаар нэвтэрмэгц шар хувцастай, цэвэрхэн цагаан царайтай ахимаг насны бас дөнгөж 20 гарч яваа эмэгтэйчүүд харагдана. Бид энэ удаад хамтран амьдрагчаа гэр бүлийн хүчирхийллийн улмаас хөнөөж, 12 жилийн хорих ял шүүхээс сонссон нэгэн бүсгүйтэй ярилцах юм. Цэвэрхэн ягаавтар царайтай, уруулаа гүн ягаанаар будсан нь өөрт нь зохисон, дулаахан инээмсэглэлтэй хүмүүжигч бүсгүй бидэнтэй ярилцахад бэлэн хүлээж байлаа.
Ингээд түүний ярилцлагын хэсгээс та бүхэндээ хүргэж байна.
“Хорих ангид ирээд найман жил болж байна. Анх хаалттай хорих ангид хоригдож байгаад нээлттэй рүү орж ирсэн. Нөхөр маань 35 настайдаа өөд болж гурван хүүтэйгээ өнчирч хоцорсон. Хэдэн жилийн дараа аятайхан ааш зантай хүнтэй учирч хамт амьдарч эхэлсэн. Эхний нэг жил хайраа, ханиа гээд л сүрхий байдаг байв. Хоёр дахь жилээсээ гэнэт л өөрчлөгдөж архи ууж, уух бүртээ надад гар хүрдэг болсон. Сүүлдээ чи миний хүн учраас чи надтай хамт уух ёстой гэж тулгаж уухгүй гэхээр зоддог байлаа. Зодуулахгүйн тулд уу гэх бүрт нь хамт ууж эхэлсэн, хамт уух нь сүүлдээ амар ч юм шиг санагддаг болсон. Би Сэлэнгэд ногоо тарьж, хэдэн үхрээсээ үр шимээ хүртэж сайхан амьдардаг байлаа. Гэхдээ тэр хүнтэй учирснаас хойш аажим аажмаар там шиг санагдаж, зодуулсан үедээ дотроо гомдож, тэвчиж ирсэн. Тэр тэвчээр нэг л өдөр тэсэрч аймшигт байдалд хүргэсэн. Хаяанд байгаа төрсөн эгчээсээ ч хамтран амьдрагчдаа зодуулдгаа нууж явсан. Цагдаад ч мэдэгддэггүй байлаа. Гурван удаа салахдаа би тэр хүнийг уучилж гэртээ дахин оруулаагүй байсан бол би шоронд тэр хүн маань шороонд булагдахгүй байждээ гэж үргэлж харамсаж, торны цаанаас олон зүйлийг бясалгалдаг. Бүсгүйчүүд, эрэгтэйчүүд хэрэв хүчирхийлэлд өртсөн нь л бол дахиж битгий найдаж уучлаарай, тэр хүнээ өөрөөсөө холдуулж сураарай. Би Аавынхаа нэрийг нар мандахад бас жаргахад ийм муухай газар дуудуулж байгаад уучлаарай, аав маань намайг шоронд ирэхээс өмнө өөд болсон. Тэр нь ч болж гэж заримдаа боддог, шоронд охиноо орлоо гэж дээлтэйгээ хатахгүй шүү дээ. “
Үргэлжлэлийг бичлэгээр үзэх:
Улаанбаатар °C 
Сэтгэгдэл (0)
Сэтгэгдэл бичигдээгүй байна