Нийт тэтгэвэр авагчдын тэтгэврийг 10 хувиар нэмэгдүүлнэ

Өнөөдөр МАН-ын бүлэг хаалттай хуралдсан билээ. Тус хурлаар цалин тэтгэврийг нэмэх, хүүхдийн мөнгийг нөхөж олгох тухай хэлэлцжээ. Тодруулбал, долдугаар сарын 1-ээс цалин, тэтгэврийг нэмэх шийдвэрийг  МАН-ын бүлэг дэмжсэн байна. Маргааш болох Засгийн газрын хуралдаанаар эцэслэн батлах юм.

Хөдөлмөр, нийгмийн хамгааллын сайд Х.Булгантуяа: Төрийн нийтлэг үйлчилгээний ажилчдын доод цалин 565 мянган төгрөг байгаа. Тэгвэл долдугаар сарын 1-нээс дээрх цалинг 750 мянган төгрөг болгон нэмэгдүүлнэ. Төрийн үйлчилгээний албанд төрийн нийтлэг үйлчилгээ, төрийн бусад үйлчилгээ гэж ангилдаг байсан. Үүнд эрүүл мэнд, боловсрол, шинжлэх ухаан багтдаг байсан. Үүнийг бид нэгтгээд төрийн мэргэжлийн үйлчилгээ гэдэг ангилалд төрийн алба хаагчдыг багтаана. Ингэснээр боловсрол, эрүүл мэнд, шинжлэх ухааны салбарын үйлчилгээний алба хаагчдын цалингийн ялгаатай байдлыг тэгшитгэж, зөрүүг арилгана. Аравдугаар сарын 1-нээс  Төрийн захиргааны алба хаагч, төрийн тусгай алба хаагчдын суурь цалинг  1 сая төгрөг болгож тэгшитгэнэ. 

Тэтгэврийг 10 хувиар нэмнэ. Өмнө нийт ахмадуудын 50 хувь нь тэтгэврийн доод хэмжээгээр авдаг байсан. Тэгвэл өнгөрсөн  2022 оны нэмэгдлээр 70 хувь болж нэмэгдсэн.  Автоматаар 20 хувь нь шууд хамгийн доод хэмжээгээр тэтгэвэр авдаг болсон нь олны дунд бухимдлыг үүсгээд байсан юм. Үүнийг бид төсвийн тодотголоор хэлэлцэнэ.  Суурь тэтгэвэр тэтгэмж, цалинг нэмж зөрүүг арилгах чиглэл барьж байна.