УИХ-ын гишүүн Б.Энхбаяр БЗС-гийн мэдээлэл нийтэд ил болмогц зээлээ төлжээ

Засгийн газраас хэрэгжүүлж буй "5 Ш" ажиллагааны хүрээнд ЦХХХ-ны сайд Н.Учрал тусгай сангуудын мэдээллийг ил тод болгож байгаа билээ. 

 Боловсролын зээлийн сангаас зээл авсан иргэдийн мэдээлэл энэ оны гуравдугаар сарын 22-ны өдөр олон нийтэд ил болсон. Тус сангийн зээлээр голдуу улстөрчид болон тэдний хамаарал бүхий хүмүүс гадаадад суралцсан атлаа буцаан зээлээ төлөөгүй нь ардын хүүхдүүдийн боломжоос хулгайлсантай адил үйлдэл болж буй. Тиймдээ ч Боловсролын зээлийн сангийн мэдээлэл өнөөдөр нийгэмд хамгийн их шүүмжлэл дагуулж байна.

БЗС-гаас зээл авсан улстөрчдийн нэг болох УИХ-ын гишүүн Б.Энхбаяр дээрх мэдээлэл нийтэд ил гарсны дараахан тус сангаас авсан 32 мянган ам.долларын зээлээ буцаан төлжээ. 

Уг зээлийг БСШУ-ны сайд асан Ц.Цогзолмаагийн 2018 оны наймдугаар сарын 31 өдрийн А/555 тоот тушаалаар тэглүүлсэн байдаг ч нийтэд мэдээлэл ил болмогц зээлээ яаравчлан төлсөн байна.

Эргэн сануулахад, УИХ-ын гишүүн Б.Энхбаяр АНУ-ын Хойд Виржинийн Их сургуульд Бизнесийн удирдлагын чиглэлээр 2007-2009 онд суралцахдаа 32000 ам.долларын зээл авч суралцсан бөгөөд сургуулиа төгссөн эсэх нь тодорхойгүй байгаа юм. Одоогоор тэрбээр уг асуудалд хэвлэл мэдээлэлд албан ёсны байр сууриа илэрхийлэхгүй байгаа нь анхаарал татаж буй.