ЖДҮ-чин гишүүдээс хойш ЖДҮ сангийн төсөв багасч, зээлдэгчийн тоо буурчээ

Жижиг, дунд үйлвэрийг хөгжүүлэх сангаас 2009 онд 1607 зээлдэгчид 40 тэрбум төгрөг, 2014 онд хамгийн их буюу 143 тэрбум төгрөгийн зээлийг 928 зээлдэгчид олгож байсан бол 2021 онд ердөө 12 зээлдэгч 810 сая төгрөгийн зээл авчээ. Эндээс ЖДҮХС байгуулагдсан 2009 оноос хойш зээлдэгчийн тоо жил ирэх тусам буурч, зээлийн санхүүжилтийн хэмжээ өмнөхөөсөө нэмэгдсэн байдалтай харагдаж байна. Тус сан анх байгуулагдахдаа буюу 2009 онд 1638 хүнд 38 тэрбум төгрөгийн зээл олгож байсан бол 2018 онд ердөө 212 зээлдэгчид 96 тэрбум төгрөгийн зээл олгосон байгаа юм. Энэ нь ЖДҮ-ийн сантай УИХ-ын гишүүд болон албан тушаалтнууд холбогдсон жилийн дүн юм.

УИХ-ын гишүүд, албан тушаалтнууд хамаарал бүхий хүмүүсээр дамжуулан тус сангаас зээл авсан нь олон нийтэд ил болсон 2018 оноос хойш ЖДҮХС-гийн зээлийн санхүүжилт болон зээлдэгчийн тоо буурсан үзүүлэлт харагдаж байна. 2020 онд 22 тэрбум төгрөгийн зээл -249 зээлдэгч, 2021 онд 810 сая төгрөг -12 зээлдэгч,  2022 онд 19 тэрбум төгрөгийг -156 зээлдэгч тус тус авчээ. Санхүүжилт буурч зээлдэгчийн тоо багасч байгаа нь жижиг дунд үйлдвэрлэл хөгжих боломжийг хязгаарлаж байгаа явдал юм. Үүний буруутан нь санг тоносон албан тушаалтнууд мөн үү? гэх асуулт гарч ирнэ. ЖДҮ-ийн санг гишүүд нь нийлж тоночихоод, ЖДҮ-ийн зээл эзэндээ хүрдэггүй гэх ойлголт нийгэмд бий болсон. Үр дүнд нь ЗГ-ын тогтоол гарч  ЖДҮХС-г “Жижиг, дунд үйлдвэрийн газар” болгосон. Эцэст нь жижиг дунд үйлдвэрлэгчдэд хүрэх санхүүжилт багасч, хамрагдах иргэдийн тоо ч хумигдаж байна.  

Энэ талаар бид эргэн сурвалжлах болно. Иргэдийн боломжийг хулгайлахад иргэдийн боломж хумигддаг байж болохгүй юм.