Н.Учрал: Өнөөдөр зургаан санг ил болгоно

Засгийн газраас хэрэгжүүлж буй "таван Ш"  ажиллагааны хүрээнд  ЦХХХ-ны сайд Н.Учрал тусгай сангуудын үйл ажиллагаа, бүх мэдээллийг ил тод, шилэн болгосоор байгаа билээ. 

Энэ Даваа гаригт Хөдөлмөр эрхлэлтийн сан болон нийгмийн даатгалын сангийн мэдээллийг ил болгосон. Тэгвэл өнөөдөр зургаан санг ил тод болгож буй талаар ЦХХХ-ны сайд Н.Учрал мэдээллээ. Тэрбээр “Засгийн газрын тусгай сангуудыг Нийтийн мэдээллийн ил тод байдлын хуулийн дагуу зургадугаар сарын 1-нд дуусах Ерөнхий сайдын албан даалгаврыг хэрэгжүүлж www.shilen.gov.mn -д нээж буй талаар өнөөдөр 10:00 цагт ЦХХХЯ-д мэдээлэл өгнө.

Дараах сангуудын мэдээллийг шилэн, ил тод байршуулна.

Үүнд:

1. БОАЖЯ: Байгаль орчин, уур амьсгалын сан
2. БШУЯ: Шинжлэх ухаан, технологийн сан
3. ХЗДХЯ: Гэмт хэргийн хохирогчид нөхөн төлбөр олгох сан
4. Соёлын яам: Кино урлагийг дэмжих сан
5. ГХЯ: Хилийн чанадад байгаа Монгол Улсын иргэдэд туслах сан-2009 оноос хойшхи дата
6. Байгаль орчинд нөлөөлөх байдлын үнэлгээ” гэжээ.

"Шилэн" ажиллагааг гуравдугаар сарын 27-нд анх эхлүүлснээс хойш 5 мянган байгууллагад 68 мэдээллийг ил болгох үүрэг өгсөн. Ерөнхий сайд шилэн индексийг эрчимжүүлэхээр 4 дүгээр сарын 17-нд албан даалгавар гаргаж, 25 тусгай сангийн мэдээллийг ил тод болгож, машинд уншигдах хэлбэрээр, инфографиктай, хайлтын системтэй болгохыг үүрэг болгосон. Гэвч мэдээлэгч нар shilen.gov.mn сайтад байршуулах мэдээллээ шуурхай ирүүлэхгүй байгааг Н.Учрал сайд тодотгосон.