Х.Болорчулуун: Мал сүргийг бүртгэлжүүлэхээр нэг ч ээмэгний худалдан авалт хийгдээгүй

ХХААХҮ-ийн сайд Х.Болорчулуунаас цаг үеийн зарим асуудлаар тодруулга авлаа.

-Хэвлэл мэдээллийн хэрэгсэл, цахим орчинд таныг 10, 20, 40 тэрбум төгрөгөөр үхэр сүрэг, бод малыг ээмэгжүүлэхээр ээмэгний худалдан авалт хийсэн гэх мэдээлэл гарч байна. Үнэхээр худалдан авалт хийгдээд байгаа юу. Мал сүргийг ээмэгжүүлэх ажлыг улсын төсвийн хөрөнгөөр хийх үү. Үүнд та тайлбар өгөхгүй юу? 

-2023 оны улсын нэгдсэн төсөвт бод мал, үхэр сүргийг ээмэгжүүлэх нэг ч төгрөг батлагдаагүй. Малыг ялган тэмдэглэж, бүртгэлжүүлэх ажлыг Малын генетик, нөөцийн тухай хууль, Мал, амьтны эрүүл мэндийн тухай хуулиар хуульчилсан байдаг. Засгийн газар болон салбарын яам хуулийн хэрэгжилтийг хангаж ажиллах үүрэгтэй. Энэ хүрээнд мал сүргийг ялган тэмдэглэж бүртгэлжүүлж, цахим бүртгэлд хамруулах ажлыг улс орон даяар үе шаттай эхлүүлэх ёстой. Монгол Улсын Засгийн газрын 2022 оны 424 дугаар тогтоолоор “Мал эмнэлгийн дэглэм бүхий хорио цээрт эрүүл бүс байгуулах” шийдвэрийг гаргасан. 

Эхний ээлжид энэхүү “эрүүл бүс”-д багтсан 7 аймгийн 71 сумын 1,2 сая толгой үхэр сүргийг ялган тэмдэглэж бүртгэл мэдээллийн санд оруулах зорилт дэвшүүлэн ажилласан.  Энэ ажлыг олон улсын төсөл хөтөлбөр, яамны хэрэгжүүлж байгаа төслийн хүрээнд 2,5 тэрбум төгрөгөөр гүйцэтгүүлэхээр тендер шалгаруулалт зарласан боловч оролцогчийн зүгээс тодруулга хүссэн. Тодруулгад хариу өгч, тендер шалгаруулалтын дагуу бараа нийлүүлэгдэх хугацаа нь малыг ялган тэмдэглэх технологит хугацаанаас хоцорсон тул тендер шалгаруулалтыг хойшлуулсан.

Үхэр сүргийг ээмэгжүүлэх ажлыг шүлхийн вакцин хийх хугацаа буюу 4-р сарын 15-наас 5-р сарын 15-нд хооронд хийх үеэр хамтатган зохион байгуулахаар төлөвлөж байсан  боловч технологит хугацаанаас хойшилсон тул энэ жилийн тендер сонгон шалгаруулалтыг хойшлуулсан. Тэгэхээр мал сүргийг ялган тэмдэглэж, бүртгэлжүүлэхээр нэг ч ээмэгний худалдан авалт хийгдээгүй гэсэн үг.