С.Бямбацогт: ИНЕГ-ын зардлаар сурсан хүмүүсийн нэрийг энэ долоо хоногт зарлана

БЗС-ийн мэдээллийг ил болгосонтой холбоотойгоор ИНЕГ-ын тэтгэлгээр суралцсан хүмүүсийн мэдээллийг ил болгох талаар ЗТХ-ийн сайд С.Бямбацогт мэдэгдлээ.

Тэрбээр “Манай салбарт харьяалагддаг зам тээвэр, иргэний нисэхийн  боловсон хүчнээ тодорхой хэмжээгээр бэлтгэдэг. Энэ бол Монгол Улсын зам тээврийн салбарт зайлшгүй бэлдэх ёстой ажил, онцлогтой салбар. Гэрээ хийж боловсон хүчнээ үеийн үед сурч эхэлсэн юм билээ.

ИНЕГ-ын хувьд 2005-2022 оны хүртэл нийтдээ 28 сая ам.долларын сургалтын тэтгэлгийг нийт 375 мэргэжилтэй боловсон хүчин бэлтгэх зорилгоор тэтгэлэг олгосон. Энд мэргэжилтэй албан хаагч болон тэдний хамааралтай хүмүүс багтсан байгаа юм байна лээ. Эндээс дийлэнх нь одоо салбартаа ажиллаж байна. Онгоцны нисгэгч, нислэгийн удирдлагч, техник, засварын мэргэжилтэн зэргээр ажиллаж байна. Зайлшгүй мэргэжлийн хүн энэ салбарт хэрэгтэй.  Гэхдээ тэдэн дунд ашиг сонирхлын зөрчил, албан тушаал нөлөө, сонирхлын байдлаа ашигласан хүмүүс байж болзошгүй байна. 

Тиймээс ИНЕГ-ыг зардлаар сурсан хүмүүсийн нэрийг баасан гаригт танилцуулъя. Үүнд бас та бүхэн авах, гээхийн ухаанаар хандах хэрэгтэй.  Гэрээгээр хүлээсэн үүргээ биелүүлж, тэтгэлэг аваад  эргээд салбартаа ажиллаж байгаа хүмүүсийг буруутгах шаардлага байхгүй. Харин сурчихаад ажлаа хийгээгүй, эрх ашиг албан тушаалын байдлаараа хамааралдаа аваад өгсөн бол асуудал ярьж болно. Тиймээс ялгаж, салгаж хандаасай гэж хүсч байна" гэлээ.