Ц.Пүрэвхүү: Сурах боломж олгосон татвар төлөгчдөдөө баярлалаа

Утааны эсрэг ээж аавууд ТББ-ын тэргүүн Ц.Пүрэвхүү БЗС-гаас 32 мянган ам. доллар буюу 110 сая төгрөгийн зээл авснаа тэглүүлээд байгаа юм. Бид энэ талаар мэдээлсэн бөгөөд хариуд нь тэрээр “Сурсан боловсорсныхоо хүчинд өнөөдөр би шулмын ав шиг сэтгүүл зүй хийхгүй, асуудалд мэргэжлийн ханддаг. Сурах боломж олгосон татвар төлөгч иргэддээ, эх орондоо маш их талархаж байна. Тусгаар улсын иргэний хувьд жирийн айлын жирийн иргэнд ийм боломж олгосон эх орноороо бахархаж байна” гэж өөрийн цахим хуудсандаа бичсэн юм.

 
Ард түмний хүүхдийн боломжийг хулгайлж суралцаад дээр нь зээлээ төлөхгүй тэглүүлсэн байтлаа татвар төлөгч иргэдэд талархал илэрхийлсэн нь доромжлол гэлтэй. Ард иргэд зээл авах шалгуур хангаагүй сэтгүүлч эмэгтэйг сургах гэж татвар төлдөггүйг сануулья. Мөн дээр нь иргэдийн боломжийг хулгайлагчдын эсрэг тэмцэж буй сэтгүүлчийг “шулмын ав шиг сэтгүүл зүй хийлээ” гэж доромжилж байгаа нь зүй ёсгүй үйлдэл юм.
Дашрамд дурдахад, Ц.Пүрэвхүү нь Утааны эсрэг ээж аавуудыг уриалж 2017 онд жагсаал цуглаан хийж явсан ч утаагаа мартаад удаж буй нь шүүмжлэлд өртөөд байсан нь саяхан. Утааны эсрэг ээж аавууд ТББ-аараа дамжуулан санхүүжилт авсан гэх мэдээлэл ч үе үе хэвлэлээр гардаг. Утаа гэх сэдвээр дамжуулан Ерөнхийлөгчийн Байгаль орчин, ногоон хөгжлийн бодлогын зөвлөх хүртэл дэвшиж ажиллаж байсан тэрээр “Тавантолгой түлш” ХХК-ийн Төлөөлөн удирдах зөвлөлийн гишүүнээр хүртэл ажиллаж байсан түүхтэй.