Зээлээр суралцсан ДӨРВӨН албан тушаалтан өдгөө БЗС-даа ажиллаж байна

 Боловсролын зээлийн сангаас зээл авч гадаадад өндөр төлбөртэй сургуульд суралцсан улстөрч болон төрийн өндөр албан тушаалтнууд, тэдгээрийн хамаарал бүхий зээлдэгч нарын мэдээллийг бид цувралаар хүргэж байгаа билээ.

Тэгвэл тус санд өнөөдрийн байдлаар ажиллаж буй дөрвөн албан тушаалтан  Боловсролын зээлийн сангаас зээл авч гадны сургуульд суралцжээ. 

Тэдний хоёр нь зээлээ тэгүүлсэн байна. 

Тодруулбал, Боловсролын зээлийн сангийн дарга Д.Гарди. ОХУ-ын ГХЯ-Дипломат Академид Олон улсын харилцааны чиглэлээр 2014-2016 онуудад суралцахдаа 32 мянган ам.доллар буюу 110 сая төгрөгийн зээл авчээ. Уг зээлээ Боловсрол Шинжлэх ухааны сайд асан Л.Цэдэвсүрэнгийн үед буюу 2020 оны 12 дугаар сард тэглүүлсэн байна. Түүнийг шалгаж эхэлсэн талаар АТГ-аас мэдээлсэн. 

Мөн тус сангийн захиргаа удирдлагын хэлтсийн дарга Г.Батнэмэх нь Английн Cecos Лондон коллежид бизнесийн удирдлагын чиглэлээр 2009-2011 онуудад суралцсан. Ингэхдээ 32 мянган ам.доллар буюу 110 сая төгрөгийн зээл авч, 2022 оны 3 дугаар сард буюу Л.Энх-Амгалан сайдын үед зээлээ тэглүүлжээ. Мэдээлэлд ойр боломжоо ашиглан өөрсдөд болон хамаарал бүхий этгээдүүдэд зээл олгосон 200 гаруй тохиолдол байгаа бөгөөд энэ нь нийт зээлийн 10 хувьтай тэнцэж байгаа юм.

Түүнчлэн БЗС-гийн гадаад зээл тэтгэлгийн хэлстийн дарга Ш.Лувсмаа АНУ-ын Метрополитанийн их сургуульд 32 мянган ам.доллараар сурсан ч гэрээний үүргээ биелүүлээгүй.

БЗС-гийн гадаад зээл тэтгэлгийн ахлах мэргэжилтэн Н.Туяа Польшийн Лодзийн их сургуульд 20 мянган ам.доллараар сурсан ч химийн инженерээр төгссөн ч гэрээний үүргээ биелүүлээгүй.