АТГ: Д.Гардид холбогдуулан хэрэг нээж, шалгаж эхэлсэн

Авилгатай тэмцэх газраас Боловсролын зээлийн сан, Нүүрсний хулгайн хэргийн талаар мэдээлэл хийлээ.

АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн:  Боловсролын зээлийн сангийн зарим албан тушаалтныг хэрхэн сонгон шалгаруулсан нь тодорхойгүй, ил тод байдлыг хангаагүй. Ажлын байрны тодорхойлолтод заасан тусгай шаардлагыг хангаагүй хүмүүсийг томилж, ажиллуулсан. Өөртөө урамшуулал, нэмэгдэл олгох шийдвэр гаргах, өөрийнхөө сургалтын төлбөрийн зээлийн барьцаа хөрөнгийг чөлөөлсөн буюу нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх хууль зөрчсөн. Гадаадад суралцагчдын зээлийг чөлөөлөх асуудлыг холбогдох хууль тогтоомжид нийцүүлж хэрэгжүүлээгүй. Тухайлбал, 2011 оноос хойш сургалтын төлбөрийг чөлөөлөх, хөнгөлөх асуудлыг УИХ-аар журам гаргаж шийдвэрлэхээр зохицуулсан. Гэвч БШУ-ны үе үеийн сайд нар хууль зөрчиж зээл чөлөөлөх тушаал, шийдвэр гаргаж ирсэн.

Хууль зөрчиж чөлөөлсөн сургалтын төлбөрийн зээл, түүний улмаас учирсан хохирлыг нөхөн төлүүлдэггүй. НДШ-ийг хөдөлмөрийн хөлсний доод хэмжээгээр төлдөг, хугацаа нь дуусаагүй байхад зээлийг чөлөөлдөг. Захиалагч байгууллагатай гэрээнд заагдсан хугацаанд ажиллаагүй хүмүүсийг зээлээс чөлөөлсөн. Боловсролын зээлийн сангийн зээлээр гадаадад суралцаж байгаа хүмүүст хувийн дансаар нь сургалтын төлбөрийг шилжүүлдэг. Мөнгөн гүйлгээг нягтлан шилжүүлдэггүй. Жишээ нь, тухайн сургуулиас австрали доллараар нэхэмжлэл ирүүлсэн байхад ам.доллараар шилжүүлдэг гэх мэт зөрчлүүд илэрч, холбогдох зөвлөмжийг ЗГХЭГ, БШУЯ-нд хүргүүлсэн талаар мэдээлэл өглөө.

АТГ-ын Мөрдөн шалгах хэлтсийн 2-р албаны дарга, ахлах комиссар Б.Батбилэг: 

Илэрсэн зөрчлүүдтэй холбогдуулан Боловсролын зээлийн сангийн гүйцэтгэх удирдлагаар ажиллаж байгаа хүнд холбогдуулан хэрэг нээж, шалгаж эхэлсэн. Цаашид, Боловсролын зээлийн сангийн үе үеийн удирдлагууд, БШУЯ-ны сайд болон бүх эрх бүхий албан тушаалтнуудыг үргэлжлүүлэн шалгана. Эрүүгийн хэрэг хянан шалгах тухай хуулийн 29.3-д заасны дагуу шалгаж байгаа хэргийн талаар нэмэлт мэдээлэл өгөх боломжгүй.