Сүхбаатар аймагт 30 хүн малдаа яваад сураггүй болжээ

Сүхбаатар аймгийн хэмжээнд аймгийн Онцгой байдлын газарт 70 гаруй дуудлага иржээ. Үүний 20 гаруй нь айлын байшингийн дээвэр хууларсан гэсэн дуудлага байна.

Төөрч алга болсон иргэдийн 50 дуудлага ирж 82 хүнийг эсэн мэнд олж ар гэрт нь хүлээлгэж өгчээ. Өнөөдрийн байдлаар малдаа яваад сураггүй болсон 30 хүнийг эрж хайх, аврах ажиллагаа үргэлжилж байна. Халзан, Түвшинширээ, Уулбаян, Мөнххаан, Сүхбаатар зэрэг сумдад цахилгааны гэмтэл гарч засварын ажил хийгдэж байна. Сүхбаатар аймгаас Улаанбаатар хот руу зорчигч тээврийн 41 зорчигчтой автобусыг Хэнтий аймагт түр саатуулан иргэдийг Хэнтий аймгийн Коллежийн зааланд байрлуулжээ. Шуурганы улмаас Баруун-Урт хотын ундны усыг хангадаг Шовдолын худаг цахилгаангүй болсныг яаралтай засварлахаар ажиллаж байна. Түмэнцогт суманд үүссэн нөхцөл байдалд шуурхай арга хэмжээ авч ажиллахыг мэргэжлийн байгууллагуудад үүрэг болгов.

Мөн Өндөрхаан Мөнххаан чиглэлийн автозам гурван хэсэгт зорчих боломжгүй байгаа тул хөдөлгөөнийг хаажээ. Үдээс хойш гэхэд нээхээр тооцжээ. Аймаг болон сумдын хэмжээнд учирсан хохирлын хэмжээг тогтоохоор мэргэжлийн байгууллагууд ажиллаж байна.