Ж.Сандагсүрэн:​ Барилга барих зөвшөөрлийг богино хугацаанд шийдвэрлэдэг болно

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч дарга Ж.Сандагсүрэн Газар зохион байгуулалтын албаны дарга Г.Батзориг, Хотын стандарт, хяналтын газрын дарга С.Төмөрдулам, Хот байгуулалт, хөгжлийн газрын Барилга, хот байгуулалтын хэлтсийн дарга Д.Хан-Уул нарт үйлдвэрлэл, үйлчилгээний буюу бизнесийн зориулалттай барилга барих зөвшөөрлийг богино хугацаанд шийдвэрлэж байх үүрэг өглөө. 

Тодруулбал, дээрх зөвшөөрлийг олгох хурал долоо хоногт нэг удаа хуралддаг байсан бол ирэх даваа гарагаас долоо хоногт 2-3 удаа хуралдан, судалж шийдвэр гаргах хугацаагаа богино болгохоор болж байгаа юм. Бизнес эрхлэгчдээс барилга барих зөвшөөрөл олгох процесс удаан байна гэсэн гомдол олон ирдэг учраас ийнхүү үүрэг даалгавар өгч байгаа аж. Гэхдээ шуурхай шийдвэр гаргахдаа бүгдэд зөвшөөрөл өгөх биш шийдвэрлэхээр судлах хугацаагаа богино болгоход л ач холбогдол өгөх ёстой гэдгийг Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн анхаарууллаа. Ингэхдээ үйлдвэрлэл, үйлчилгээний барилгад онцгой анхаарах шаардлагатай байна. 

Учир нь ихэнх үйлдвэр, агуулах хотын захад бий. Энэ нь төвлөрлийг сааруулах болон хотын захад ажлын байр олноор бий болгох ач холбогдолтой. Мөн эдийн засагт өгөх өгөөж нь өндөр тул ийм барилгын тоог нэмэхэд хотын зүгээс хүндрэл, хүнд суртал бага байлгах,ач холбогдох өгөх ёстой гэсэн бодлого барьж байна. Манай оронд дулааны улирал богино тул бүтээн байгуулалт хийх хугацаа бага байдаг онцлогтой тул энэ төрлийн шийдвэрийг бизнесийнхний хэрэгцээ, шаардлагад нийцүүлж, түргэн шуурхай гаргаж байх шаардлагатай байдаг. Одоогоор нийслэлд 150 зөвшөөрөлгүй барилга баригдаж, нураах асуудал яригдаж байна. Мөн газар олголттой холбоотой 250 шүүхийн маргаан бий. Эдгээр асуудал үүсэхэд нөлөөлсөн нэг хүчин зүйл нь газар олголтын шийдвэрлэлтийн үйл явцад хугацаа алддаг энэ асуудал гэдгийг тэрээр хэлж байв. Эцэст нь энэ удаагийн үүрэг, даалгаварт хотын А бүс болон тусгай хамгаалалттай газар орохгүй гэдгийг онцолсон. Хуралд оролцсон хэлтийн дарга нар ирэх долоо хоногоос эхлэн барилга барих зөвшөөрлийг богино хугацаанд шийдвэрлэхэд онцгой ач холбогдол өгч, үүрэг даалгаврыг хэрэгжилтийг хангахаар хичээнгүйлэн ажиллахаа илэрхийллээ.