Жил бүр дэлхий нийтэд 1.5 сая хүн зам тээврийн ослын улмаас амь насаа алдаж байна

Дэлхийн эрүүл мэндийн байгууллагаас түнш байгууллагуудтайгаа хамтран НҮБ-аас жил бүр зохион байгуулдаг замын хөдөлгөөний аюулгүй байдлын 7 хоног арга хэмжээг “Урьтаж Ухаар” уриалга дор 2023 оны Тав дугаар сарын 15-наас 21-ний өдрүүдэд зохион байгуулахыг дэлхий нийтэд уриалжээ.

Жил бүр дэлхий нийтэд 1.5 сая хүн зам тээврийн ослын улмаас амь насаа алдаж, 50 орчим сая хүн гэмтэж байна.  Амиа алдаж байгаа 4 хүн тутмын нэг нь явган зорчигч, унадаг дугуйгаар хөдөлгөөнд оролцогч нар байгаа талаар Дэлхийн эрүүл мэндийн байгууллагаас гаргасан судалгаанд дурджээ. 

Иймд явган зорчигч, унадаг дугуйгаар аюулгүй зорчих боломжийг бүрдүүлэх, нийтийн тээврийн хэрэгслийн хүртээмжийг нэмэгдүүлэх чиглэлд анхаарал хандуулахыг Дэлхийн эрүүл мэндийн байгууллагаас Нэгдсэн Үндэсний Байгууллагын гишүүн улс орнуудад зөвлөж байна. 

Замын хөдөлгөөний аюулгүй байдлын 7 хоног арга хэмжээг  “Урьтаж ухаар” уриалга дор Замын хөдөлгөөний аюулгүй байдлын үндэсний зөвлөлийн ажлын алба, Дэлхийн эрүүл мэндийн байгууллага /ДЭМБ/-ын суурин төлөөлөгчийн газар, Зам, хөгжлийн тээврийн яам, Эрүүл мэндийн яам, Тээврийн цагдаагийн алба хамтран хэрэгжүүлж байна. 

Мөн нийслэлийн ерөнхий боловсролын сургуулийн ахлах ангийн суралцагч нарт “Унадаг дугуй, мопед, мотоциклоор замын хөдөлгөөнд оролцоход анхаарах асуудал” сэдвээр сургалт зохион байгуулах, сургуулийн өмнөх боловсролын байгууллагад суралцдаг хүүхэд багачуудын дунд “Замын хөдөлгөөний цагаан толгой 2023” тэмцээнийг улсын хэмжээнд тус тус зохион байгуулж байна.

Түүнчлэн нийтийн тээврийн автобуснуудын техникийн бүрэн бүтэн байдалд хяналт тавих, жолооч нарын замын хөдөлгөөний дүрмийн мэдлэгийг дээшлүүлэх чиглэлээр сургалт зохион байгуулахаар төлөвлөн ажиллаж байгаа тухай мэдээллээ.