Д.Тогтохсүрэн: Иргэд бухимдалтай байна, 76 гишүүнээ муулсаар байгаад нэр муутай болчихож

Өнгөрсөн долоо хоногт УИХ-ын гишүүд тойрогтоо ажиллаж,  Үндсэн хуулийн өөрчлөлтөөр УИХ-ын гишүүдийн тоог нэмэгдүүлэх, сонгуулийн тогтолцоог өөрчлөх хуулийн төслийг танилцуулж, энэхүү өөрчлөлтийг оруулснаар гарах давуу болон сул тал, бусад хөгжингүй оронд хийсэн судалгаа туршлагыг иргэдэд танилцуулсан. 

Үндсэн хуулийн өөрчлөлтийг иргэд хэрхэн хүлээж авч байгаа талаар гишүүдийн байр суурийг тодрууллаа. 

Тэрбээр "Иргэд нэлээд бухимдалтай байна. Нэгдүгээрт, энэ жил өвөлжилт хүнд байсан учраас малчид маань хүнд хүн, малгүй л зутарсан байна. Хоёрдугаарт, үнийн өсөлт иргэдэд бухимдал үүсгэж байна. Гуравдугаарт, сүүлийн үед 76 гишүүнээ муулсаар байгаад нэр хүндгүй болчихжээ. 76 луйварчин, хулгайч гэсэн ойлголт нийгмийн сэтгэлзүйд бий болчихжээ. Тулгамдаж буй олон асуудал бий. Цалин, тэтгэврийг нэмэх, хүүхдийн мөнгийг хүүхэд бүрт өгөх, уул уурхай дахь иргэдийн эсэргүүцэл зэрэг олон асуудлыг хөндөж байна. Энэ бүхнийг маргааш бүлгийн хурлаар дэлгэрэнгүй ярилцана. Үндсэн хуулийн нэмэлт, өөрчлөлтөд иргэд дургүй байна. Тоо, тогтолцоогоо өөрчлөөд эерэг өөрчлөлт гарч чадах уу гэдгийг илүүтэй асууж байна. Тооноос илүүтэй холимог тогтолцоог иргэд дэмжиж байна. Гэхдээ намын нэрийн ард нэр хүндгүй гишүүд ороод ирэх вий гэдгийг мөн хэлж байна" гэлээ.