Драмын театрын урд талын зогсоолыг татан буулгах шийдвэр гарчээ

Сүхбаатар дүүргийн 1 дүгээр хорооны нутаг дэвсгэр Улсын Драмын Эрдмийн театрын урд талын автомашины зогсоолыг татан буулгаж, тохижуулах шийдвэрийг  Нийслэлийн ЗДТГ-аас гаргажээ.

Холбогдох байгууллагуудын хамтран хийсэн судалгаагаар нийслэлийн төвийн зургаан дүүрэгт 178 га талбайд 62,057 автомашины зогсоол байна. Эдгээр зогсоолыг ангилбал,

• олон нийтийн зориулалттай 31,623,
• орон сууцны дундын эзэмшилд 15,380,
• хязгаарлагдмал буюу зөвхөн өөрийн хэрэгцээний зориулалттай 7,277,
• худалдааны зориулалттай 7,777 автомашины зогсоол байна.

Үүнээс Их тойрууд 344 байршилд 15,181 зогсоол, Бага тойрууд 50 байршилд 1,712 автомашины зогсоол байгаа судалгаа гарчээ. Зогсоолын менежментийг "Нийслэл Улаанбаатар хотын төвийн зургаан дүүргийн нутаг дэвсгэр дэх авто зогсоолын багтаамж, эзэмшлийн судалгааг гаргах, бүртгэх, цаашид хэрэгжүүлэх арга хэмжээний талаар санал боловсруулах" ажлын хэсэг төрөл бүрээр судалж, зогсоолыг бүрэн автомат, төлбөр, бүртгэлийг цахимаар хийдэг болгох шаардлагатай аж. Ингэхдээ бүртгэл, хяналтын систем хамгийн чухал байгаа юм.