"Циркийг улстөржүүлмээргүй байна"

Циркийн хувьчлалтай холбоотой олон асуудал хөвөрдөг. Тэгвэл үүнд Монголын циркийн холбооны ерөнхийлөгч Ю.Гэрэлбаатар ямар байр суурьтай байгаа талаар тодрууллаа. Тэрбээр "Циркийн урлаг гэдэг бол асар өндөр зардалтай, бид дэлхийд тэргүүлдэг. Хэрвээ энэ урлагийг төр дангаараа аваад явая гэвэл төсвөөс маш их зардал гарах нь тодорхой. Гол нь зөв менежмент хэрэгтэй байгаа юм. Зарим хүмүүс хэт улстөржүүлж байна. Гэтэл бид циркээ авч үлдэх тал дээр олон ажил хийж байна. Маргааш л гэхэд маш том бөмбөрцөг хэлбэрийн циркийг оруулж ирэх гэж байна. Ирэх аравдугаар сард гэхэд 300 хүүхдийн хүчин чадалтай зургаан том залтай циркийн сургуулийн шав тавигдах гээд зураг төсөл нь батлагдчихсан байж байна. Болж бүтэж байгаа зүйлээ ярих нь зөв болов уу" гэсэн юм.