Г.Занданшатар: Ойрын хугацаанд төсвийн тодотгол хийж, төрийн албан хаагчдийн цалинг нэмнэ

УИХ-аас 2023 онд төрийн албан хаагчдийн нийгмийн баталгааг хангах, цалин хөлсний тогтолцоонд шинэчлэл хийх зорилтыг тавьж байгааг УИХ-ын дарга Г.Занданшатар зарлалаа. Ингэхдээ Япон, БНСУ зэрэг төрийн албаны соёл өндөр хөгжсөн улсуудын сайн туршлага дээр үндэслэн бүтээмжид суурилсан цалин хөлсний систем, хөдөлмөрийн адил үнэлэмжийн зарчимд шилжих шаардлагатай байгааг онцолсон юм. Өнгөрсөн хугацаанд төрийн албаны цалин хөлсний тогтолцоо алдагдаж, ялгавар үүссэн нь шударга бус байдал үүсгэж байна. Иймд төсвийн тодотгол ойрын хугацаанд хийж төрийн албаны цалинг нэмэгдүүлж, улмаар үүсээд буй цалингийн шударга бус ялгааг цаашид арилгах боломж бүрдэнэ гэж тэрээр мэдэгдлээ.

УИХ-аас Уул уурхайн бүтээгдэхүүний биржийн тухай хуулийг батлах зэргээр төсвийн орлогыг нэмэгдүүлэх арга хэмжээнүүдийг идэвхтэй авч хэрэгжүүлсний үр дүнд оны эхний улирлын гүйцэтгэлээр Монгол улсын төсвийн орлого 600 тэрбум төгрөгөөр давж биелсэн. Энэ онд төсвийн нөхцөл байдал сайн байх төлөвтэй тул төрийн албаны цалингийн ялгааг бууруулах, тэтгэвэр тэтгэмжийг нэмэгдүүлэх суурь нөхцөл бүрдсэн гэж УИХ-ын дарга мэдэгдлээ.