Б.Пүрэвдорж: 100 ямаанд 60 ухна гэгчээр гишүүдийн тоог нэмэх гэж байгаа бол 100-аас хэтрүүлэх хэрэггүй

УИХ-ын гишүүн Б.Пүрэвдорж Үндсэн хуулийн нэмэлт өөрчлөлт, Сонгуулийн хуулийн талаар мэдээлэл хийлээ. Тэрбээр Өмнө нь Үндсэн хуулийн нэмэлт, өөрчлөлт оруулах үеэр манай нам эв зүйгээ олоогүй С.Эрдэнэ, Х.Баттулга нарын хэн нь намын дарга болох нь мэдэгдэхгүй энэ үед Үндсэн хуулийн нэмэлт, өөрчлөлтөөр манай бүлгийн гишүүд өөр өөрийнхөө үзэл бгиаримтлалаар санал өгсөн.

Үүний үр дүнд давхар дээлтэй сайд нар бий болсныг бүгд мэдэж байгаа. Өнөөдөр Сонгуулийн хуулийг дагалдуулаад Үндсэн хуульд нэмэлт, өөрчлөлт оруулах төслийг оруулах нөхцөл байдал бий болж байна. МАН Сонгуулийн хуульд 38:38 буюу 50, 50 хувиар. 50 хувь нь мажоритар, 50 хувь нь пропорционал байхаар оруулж ирсэн. Энэ бол тактик. Өөрөөр хэлбэл УИХ-ын гишүүний ихэнх нь энэ хуулиар нэр дэвшиж чадахгүй. Тийм учраас Үндсэн хуулийн нэмэлт, өөрчлөлтөөр гишүүдийн тоог нэм гэсэн шахалт өгч байна. Харамсалтай нь АН-ын байр суурь тодорхой бус байна гэж үзээд Үндсэн хуулийн нэмэлт, өөрчлөлтийг хойшлуулахаар болоод байна. Өнөөдөр бол өмнөхөөсөө арай өөр нөхцөлд байгаа. Манай нам даргатай болсон. Дээрээс нь тамга, гэрчилгээгээ авсан. Бүх юм хууль ёсны дагуу болсон. Тийм учраас Үндсэн хуулийн нэмэлт өөрчлөлт, Сонгуулийн хуулийн талаар намын удирдлагаас шийдвэр гаргаж, УИХ дахь бүлэгтээ танилцуулах ёстой. Уг шийдвэрээ намаас яаралтай гаргахгүй бол хууль хэлэлцэх хугацаандаа багтахгүй болно. 

Миний бие өнгөрсөн оны долдугаар сараас эхлэн нийт 60 гаруй удаагийн уулзалтыг Ховд аймгийн иргэдийн дунд зохион байгуулсан. Ингэхэд иргэд "100 ямаанд 60 ухна гэгчээр 152 гишүүнтэй болох асуудлыг дэмжихгүй. Эсвэл УИХ-ын гишүүний тоог 100-гаас дээш гаргаж болохгүй" гэсэн саналыг дэвшүүлж байсан" гэлээ.