Ж.Бат-Эрдэнэ: 70 тэрбумын авлига нь 700 саяын цементийн хулгайч болоод сэвэгдсэн, Дарханы замыг би холбосон шүү

Хөгжлийн банкны гэх хэргийн гэм буруугийн шүүх хурал ес дэх өдрөө үргэлжилж байна. 

ЗТХ-ийн дэд сайд асан Ж.Бат-Эрдэнийг албан тушаалын байдлаа урвуулан ашигласан, авлига авсан гэх үндэслэлээр яллагдагчаар татагдаад буй. Шүүх хурлын танхимд тэрбээр "Намайг Дарханы замын тендер будилаантуулсан, дэд сайдын албан тушаал хашиж байхдаа үндэслэлгүй хөрөнгөжсан гэж хорьсон. Гэтэл хоёр хоног Ж.Батзанданы зурагтай эвлүүлээд 70 тэрбум төгрөгийн хахууль авсан гэж зохион байгуулалттай сэвсэн.  Азийн хөгжлийн банкны санхүүжилттэй Дарханы зам 71 сая ам.долларын төсөвтэй. Манайд байгаа 13 мянган км авто замын урсгал зардалд 50 тэрбум төгрөг шаардлагатай байдаг. 70 тэрбум төгрөгөөр 70 километр зам тавина. Ингэж зохион байгуулалттай сэвэхдээ таван байршлаас сэвсэн байгаа юм. Би энэ чиглэлийн хүн болохоор мэднэ ш дээ. 

Тэсэлгүй би өөрийн хаягаас пост бичсэн. "70 тэрбумын асуудал мөнгөгүй, мөнгө хүсээд байгаа хүнд бол ерөөл ч юм шиг, мөрдөгдөж шалгагдаж байгаа надад хараал ч юм шиг" гэж бичсэн. Тэгээд мөрдөгдөж шалгагдаад ирэхээр 7 тэрбум болоод, 700 сая төгрөг болоод ирсэн. 700 сая цементийн хулгайч. Өнөөдөр 70 сая болж ирж байгаа юм. 

Харин миний бие бүтэн дөрвөн сар борц болтлоо Дарханы зам дээр ажилласан. Намайг очиход овоолсон шороо л байсан ш дээ. Хуулийн дагуу ажилласан. Тэрний дагуу дарханы замыг намар хоёр эгнээг нь холбосон. Энэ нь зарим хүнд таалагддаггүй юм уу хаашаа юм. Прокурорын тогтоол дэндүүлсэн ш дээ. Дара нь Дарханы замын тендерийн үеэр би ажилгүй байсан. Гэтэл дараа нь ХХЗХ-ны орон тооны бус зөвлөх байхдаа гэж оруулж ирж байгаа юм. Ямар нэг байдлаар л яллах гэж байгаа юм" гэв.