Г.Ганболд: Манай улсын нүүрсний ачилт, буулгалтын талбай нь хүртэл Хятадын нүүрсний компаниудын мэдэлд байна

УИХ-ын гишүүн, Нүүрсний хэргийг хянан шалгах түр хорооны дарга Г.Ганболдоос цаг үеийн асуудлаар тодруулга авлаа. 

 Нүүрсний хэргийг хянан шалгах түр хорооны ажлын явц болон нээлттэй сонсгол хойшилсон шалтгаан ? 

Хуулиараа бол манай түр хороо 2023 оны 6 сарын 10 хүртэл ажиллах ёстой. Бидний хувьд сонсгол хийхэд бэлэн байна. Шинжээчид дүгнэлтээ гаргасан. Хянан шалгагч нар нотлох баримтуудаа бэлдсэн. Яг одоо бид хуулийн дагуу долоо хоногийн өмнө гэрчээр дуудах хүмүүсээ зарлах ёстой байсан. Гэрчээр дуудах хүрээндээ бид АТГ-аас тодорхой хүсэлтүүд явуулсан. Энэ сонсголд хорих 461-р ангид хоригдож байгаа “Эрдэнэс тавантолгой” ХК -ийн захирал Б.Ганхуягийг оролцуулж өгөөч гэж. Мөн “Тавантолгой төмөр зам” компанийн гүйцэтгэх захирлаар ажиллаж байсан Н.Удаанжаргал байна.

Тэр хүн өмнөх цахим сонсголын үеэр гадаадаас цахимаар оролцъё гэж хүсэлтээ илэрхийлсэн. Бид энэ дагуу хуулийн байгууллагад хүсэлт гаргасан. АТГ-аас танай явуулах гэж байгаа сонсгол мөрдөн байцаах ажиллагаатай цуг явж байгаа учраас мөрдөн байцаалтын нууцыг задруулах, саад учруулах, шүүхээр гэм бурууг нь тогтоогоогүй байхад хүнийг нийгмээр яллуулах нөхцөл үүсэж магадгүй гэдэг байдлаар хяналт шалгалтын хуулийн 33-9 т заасны дагуу хууль зөрчиж байна гэсэн хариу ирүүлсэн. Манай түр хорооны гишүүд санал нэгтэй хүлээн авч сонсголыг хойшлуулсан.