Б.Баттөмөр: Монгол Улс нэг хүнд ногдох гадаад өрөөрөө дэлхийд тэргүүлж байна

УИХ-ын гишүүн Б.Баттөмөр Оюутолгойн асуудлаар Ерөнхий сайдад асуулга тавьсан талаар мэдээлэл хийлээ. 

"Оюутолгой төсөл 2021 онд 163 мянган тонн зэсийн баяжмалыг экспортод гаргаж, 1.9 тэрбум ам.долларын орлого олсон статистик бий. Далд уурхай ашиглалтад орсноор борлуулалтын хэмжээ тав дахин нэмэгдэх боломжтой. Оргил ачааллын үе нь 2028-2036 он хүртэл үргэлжилнэ. Оргил ачааллын үед 500 мянган тонн зэсийн баяжмалыг үйлдвэрлэж, экспортод гаргана. Энэ үзүүлэлтээрээ дэлхийн зэсийн дөрвөн том компанийн нэг болж, Монгол Улс зэсийн том тоглогч болно. Гэвч одоогоор үр ашиг нь тодорхойгүй байна. 

Сая далд уурхайн нээлтийн үеэр 2032 оноос эхлэн Монгол Улс ногдол ашиг авна гэсэн тоо хэлсэн. Зарим яамдад байгаа тооцооллоор  2038 оноос гэж байна. Тиймээс хэзээнээс  яг Монгол Улс ашиг хүртэх вэ гэдэг бол эхний асуулт.

 Хоёрдахь асуултын тухайд Оюутолгойн далд уурхайн ашиглалт 2041 он дуусна. 2041 онд Монгол Улсын төсөвт ямар хэмжээний орлого орох вэ зэрэг эдийн засгийн дэлгэрэнгүй үзүүлэлтүүд. 

Гуравдугаарт, гүний уурхайд ашиглагдах усны хэмжээ, төлбөр тооцоо, байгаль орчинд үзүүлэх нөлөөллийн талаар,

 Дөрөвт, нэг тонн зэсэд агуулдагдах алтны хэмжээний мэдээлэл чухал байна.

 Монгол Улсын нийт өр 33.4 тэрбум ам.доллар. Үүнээс Засгийн газрын өр  8 тэрбум ам.доллар. 2021 он хүртэл үүссэн 2.3 тэрбум ам.долларыг тэглэсэн гэдэг ч манай гадаад өрөөс хасагдаагүй. Энэ чиглэлээр ямар ажил хийж байгаа вэ гэдгийг мөн тодруулна. Монгол Улс нэг хүнд ногдох гадаад өрөөрөө дэлхийд тэргүүлж байна" гэлээ.