"Мэргэжлийн бус эмч нарын буруугаас болж охин минь амиа алдлаа"

Баянгол дүүргийн нэгдсэн эмнэлэг 3 настай охинд буруу эмчилгээ хийснээс болж амиа алдсан охины аав Г.Энхбилэг мэдээлэл хийлээ. 

 Г.Энхбилэг хэлэхдээ тэрбээр " БГД-ийн нэгдсэн эмнэлэг ханиад хатгаагаа эмчлүүлэхээр очсон охиныг минь гэдэсний ханиад хэмээн оношилж, долоон хоногийн дараа нас барсан. Миний охин нэгдүгээр сарын 15-нд нас бараад, ажил явдал нь 18-нд болсон. Ингээд 20-ны өдөр БГД-ийн цагдаагийн нэгдүгээр хэлтсийн мөрдөгчид "Эмнэлгийн камерын бичлэгийг хурдан авмаар байна. Энэ чухал нотлох баримт" гэж хэлж байсан. Ингээд хоёрдугаар сарын 1-нд цагдаадаа албан тоотоор өргөдөл өгөөд эмнэлгийн давхруудын бичлэг, охин маань эргэлтээр ээжтэйгээ уулзаад алхаж байгаа, эм тариандаа алхаад явж байгаа бичлэг зэргийг авах хүсэлтээ өгсөн. Гэтэл эмнэлгийн зүгээс "Манай эмнэлгийн камерууд бичлэг хийдэггүй" гэх хариулт өгсөн.Уг нь эмнэлэгт эмчлүүлж байхад, сувилагчийн өрөөний үүдэнд эм тариандаа очерлож байхад "Битгий камерт өртөөд бай. Наашаа бол. Цаашаа бол" гээд л байдаг байсан. Сая үүдээр нь ороход ч хяналтын камерын бичлэгүүд нь ажиллаж байна. Тийм байтал миний охины хэвтэн эмчлүүлж байх хугацааны бичлэг байхгүй. Манай камерууд бичдэггүй гэж байгаад нь маш их гомдолтой байна. Би цагдаад гомдолтой байгаагаа хэлсэн. ЭМЯ-нд ч энэ асуудлыг яаралтай шийдэж өгнө үү гэж гомдол өгсөн.

 Миний охин өмнө нь эмнэлэгт хэвтэж байгаагүй. Анх удаа энэ эмнэлэгт хэвтээд л хариуцлагагүй эмч нарын буруу үйл ажиллагаанаас болоод амиа алдсан. Бие нь хүндрээд байхад тариануудаа улам ар араас нь шахаад, таарахгүй тариа, антибиотек 2-3-аар нь хийчихсэн байгаа юм. Анх эмнэлэгт ирэхдээ хөлөөрөө алхаад л явж байсан" гэлээ.