Г.Занданшатар: Энд тэнд цүнх баригч нараа дүүргээд, тэр хүмүүс төрийн албаны нэр хүндийг унагааж байна

УИХ чуулганы өнөөдрийн нэгдсэн хуралдаанаар ТАЗ-ийн 2021, 2022 оны үйл ажиллагааны тайланг хэлэлцэв. Хэлэлцүүлгийг дүгнэж хэлсэн үгэндээ УИХ-ын дарга Г.Занданшатар, төрийн албанд 1000 гаруй хүн хууль бусаар томилогдсон гэсэн тоо явж байсан боловч өнөөдөр 6000 гэсэн зөрүүтэй мэдээлэл гарч ирж байгааг онцоллоо. Тэрбээр, Төрийн албаны ёс зүйн тухай хуулийг яаралтай батлах шаардлагатайг тэмдэглэж, ардчилал гэдгийг дураараа авирлах, анархизм, бүх юм эрх чөлөөтэй, юу дуртайгаа хийж болно гэсэн ойлголт гүнзгийрсэн. Гэр бүл, төр нийгмийн гээд нийгмийн бүх харилцаанд ёс зүйн хэм хэмжээ алдагдлаа. Ёс зүйг төлөвшүүлж, хэм хэмжээ бий болгож байж төрийн албаны нэр хүнд өснө. Төрийн албаны нэр хүндийг унагаж байгаа бас нэг зүйл бол нам, бүлэглэл, хэсэг бүлгийн эрх ашгийг төлөөлсөн хүмүүс. Энд тэнд цүнх баригч нараа дүүргээд, тэр хүмүүс төрийн албаны нэр хүндийг унагаж янз бүрийн асуудалд холбогдож байна. Ингэж Монгол төрийн албыг аль ч нам, эвслийн үед ингэж дампууруулж ирснийг одоо таслан зогсоох ёстой. Иймд төрийн албаны ёс зүйн хэм хэмжээгээ хуульчилж, цэвэр сонгон шалгаруулалтын засаглал гэдэг юмаа нэн даруй тогтоох хэрэгтэй гэлээ.

Ёс зүйн асуудлыг хуульчилдаггүй, уламжлал, ёс заншил, зан суртахуун болон хүн ёсны хэм хэмжээгээр тогтдог зүйл хэмээн үзэх нь бий. Гэвч Япон, ХБНГУ, БНСУ зэрэг олон оронд төрийн албан хаагчдын ёс зүйн хэм хэмжээ, шалгуур үзүүлэлтийг тогтоосон хуулиа батлан мөрдүүлж байдаг. Энэ талаар УИХ-ын дарга жишээлэн дурдаж, ялангуяа Азийн улс орнуудад ёс зүйн асуудалд “зөөлөн ур чадвар”-ыг тэргүүлэх шаардлага болгон тавих болсныг өгүүлэв.