“Барааг дотоодод болон гадаадад боловсруулах горим”-ыг хэрэгжүүлэх асуудлаар Зүүн хойд азийн орнууд уулзлаа

Зүүн хойд Азийн болон Түмэн голын их сав газрын бүс нутгийн, ялангуяа хөдөө аж ахуй, эрчим хүч, байгаль орчин, аялал жуулчлал, худалдаа, хөрөнгө оруулалт, тээврийн салбарын интеграци, эдийн засгийн тогтвортой хөгжлийг хөхүүлэн дэмжих зорилгоор НҮБ-ын Хөгжлийн хөтөлбөрөөс анх 1991 онд санаачилсан засгийн газар хоорондын хамтын ажиллагааны Их түмэн санаачилга (ИТС) нэгдэл нь одоогийн байдлаар БНХАУ, БНСУ, Монгол Улс, ОХУ гэсэн дөрвөн гишүүн оронтой.

Монгол Улсын Гаалийн байгууллагаас “Барааг дотоодод болон гадаадад түр хугацаагаар боловсруулах гаалийн бүрдүүлэлтийн горимын тусламжтай жижиг дунд үйлдвэрлэлийн экспортыг дэмжих” төслийг 2019 онд санаачилж, өдгөө ийнхүү биеллээ олж талууд анхны уулзалтаа хийж байна.

Тус хөтөлбөрийг БНСУ-ын Итгэмжлэгдсэн аж ахуйн нэгж (ИААН)-ийн холбоо, БНСУ-ын Мөрөөдлийн гаалийн алба, НҮБ-ын Хөгжлийн хөтөлбөрийн БНХАУ дахь салбар, ИТС-ийн Нарийн бичгийн даргын газар болон Монголын гаалийн байгууллагууд хамтран хэрэгжүүлж байна.

Уулзалтаар гишүүн орны гаалийн байгууллагууд “Барааг дотоодод болон гадаадад боловсруулах горим”-ыг хэрхэн хэрэгжүүлж буй туршлага солилцон, цаашдын хамтын ажиллагааг өргөжүүлэн хөгжүүлэх боломжийн талаар ярилцаж байна.

Мөн БНСУ-ын ИААН-ийн холбоо Гаалийн ерөнхий газрын төлөөлөл хоёр орны гаалийн байгууллагын хооронд байгуулсан “ИААН-ийг харилцан хүлээн зөвшөөрөх хэлэлцээр”-ийн хэрэгжилтийг хангах, түүний дотор хөтөлбөрийн үр нөлөөг сайжруулах замаар эдийн засгийн өрсөлдөх чадварыг дэмжих чиглэлээр цаашид хэрэгжүүлэхээр ярилцжээ.

Эх сурвалж: Монголын гааль