Д.Сумъяабазар: Зам дээр цацсан бодис хайлалт муу байгаа ч шуурхай арга хэмжээ авч шөнийн турш ажиллав

Нийслэлд их хэмжээний цас орсноос автозамд халтиргаа, гулгаа үүсээд байна. Уг асуудлаар Улаанбаатар хотын дарга Д.Сумъяабазар дараах зүйлийг бичжээ.

Тэрбээр: 
“Өчигдөр орж эхэлсэн цас өнөөдөр өглөө хүртэл орж байна. Үргэлжилсэн их хэмжээний цас орсноос авто зам дээр цацсан бодис хайлалт муу байгаа ч шуурхай арга хэмжээ авч шөнийн турш ажиллав. Ням гарагийн өглөө 07:30 цагийн байдлаар гудамж, зам талбайн цасны цэвэрлэгээнд Хот тохижилтын газар болон дүүргүүдийн ТҮК, гэрээт аж ахуй нэгж байгууллагуудаас нийт 236 зам талбайн үйлчлэгч, тусгай зориулалтын  65 машин техниктэй ажиллаж, зам талбайд халтиргаа гулгаа үүсэхээс урьдчилан сэргийлж, 251тн бодис, 56тн давс зарцуулаад байна. Үргэлжлүүлэн хариуцсан зам талбай гүүрнүүд рүү өгсүүр уруу замуудад нэмэлтээр бодис цацаж, зам талбайн үйлчлэгч, зам цэвэрлэгээний бичил машинаар явган зам автобусны буудлыг цэвэрлэнэ. Та бүхэн замын хөдөлгөөнд анхаарал, болгоомжтой оролцоорой” гэв.