МАН бүлэг: Халдашгүй байдлын дэд хорооны шийдвэрийг дэмжсэн

УИХ-ын гишүүний халдашгүй байдлын дэд хорооны хурал найман цаг орчим хаалттайгаар хуралдаж Улсын ерөнхий прокуророос ирүүлсэн УИХ-ын нэр бүхий гурван гишүүний бүрэн эрхийг түдгэлзүүлэх эсэх саналыг 100 хувь дэмжсэн. УИХ-ын гишүүн Т.Аюурсайхан, Н.Наранбаатар, Д.Бат-Эрдэнэ нарын бүрэн эрхийг түдгэлзүүлэх шийдвэрийг УИХ дахь МАН-ын бүлэг дэмжиж байгаагаа илэрхийллээ.

Бичлэгээр үзэх:

Нэмэлт

Улсын Ерөнхий Прокурор Б.Жаргалсайхан: Нэр бүхий гурван УИХ-ын гишүүний бүрэн эрхийг түдгэлзүүлэх саналыг өнгөрсөн тав дахь өдөр оруулж ирсэн. Тухайлбал, Т.Аюурсайхан гишүүнийг үндэслэлгүй хөрөнгөжих, зохион байгуулалттай бүлэг байгуулсан гэсэн үндэслэлээр санал оруулсан. Энэ хэрэгтэй холбоотой түүнийг 11 хүнтэй уулзахыг хязгаарласан бол хэрэгт холбогдуулан нэг хүнийг яллагдагчаар татсан. Мөн 119 хүнийг гэрчээр дуудсан. Д.Бат-Эрдэнэ гишүүнийг мөнгө угаах, хөрөнгө завших, эрх мэдэл албан тушаалын байдлаа урвуулан ашиглах гэдэг зүйл заалтаар яллагдагчаар татсан. Энэ хэрэгт нийт 66 хүнийг гэрчээр асууж 11 хүнийг яллагдагчаар татаад байна. Компанийн хувьцаа, шилжилт хөдөлгөөнийг хязгаарласан. Харин Н.Наранбаатар гишүүнийг үндэслэлгүй хөрөнгөжих , эрх мэдэл албан тушаалынхаа байдлыг урвуулан ашигласан гэж яллагдагчаар татсан. Үүнд 16 эд хөрөнгө битүүмжилж, 60 хүнийг гэрчээр асуусан. Баримт нотолгооны үр дүнд гишүүдтэй холбоотой мөрдөн шалгах ажиллагаа явагдах гэж байгаа учраас мөрдөх байгууллагад ажиллах боломжийг олгооч ээ, түдгэлзүүлэхгүйгээр шалгах ажиллагаа явуулах нь шалгах ажиллагаа явуулж буй мөрдөгчид эрсдэл үүснэ. Ямар эрсдэл вэ гэхлээр энэ ажиллагааны үр дүнд аль нэг хэсэгт мөрдлөг хийж, гишүүний хамаарал бүхий обьектод нэгжлэг хийхэд энэ нь хууль бус ажиллагаа болдог. Энэ нь гишүүний халдашгүй дархан байдалд нөлөөлсөн болно. Учир нь УИХ-ын тухай хуулийн 9.8-д гишүүнийг албадан саатуулах, орон гэр, обьектод нэгжлэг хийхийг хориглодог учир бүрэн эрхийг түдгэлзүүлж шалгах саналыг бид хүргүүлсэн.