“Илүүдэл жингүй-Эртэч Монгол” аянаар "Дасгалын жор" гаргажээ

Биеийн тамир, спортын улсын хорооноос иргэдийг идэвхтэй дасгал хөдөлгөөнд уриалах зорилгын хүрээнд дэвшүүлсэн “Илүүдэл жингүй-Эртэч Монгол” аянд Өвөрхангайчууд идэвхтэй оролцож байна.

Аяны хүрээнд аймаг, сумын спорт заалууд үнэ төлбөргүй үйлчилж байгаа бөгөөд өдөрт 200 орчим хүн нэгдэж, дасгал хөдөлгөөн хийж байгаа юм. Өнөөдрийн хувьд Арвайхээр хотын спорт заалуудаар 72, Бат-Өлзий сумын Соёлын төвд 25, Нарийнтээл суманд 16, Гучин-Ус суманд 66, Хужирт суманд 18, Бүрд суманд 11, Хархорин суманд 4, Өлзийт суманд 35, мөн аймгийн Мэргэжлийн хяналтын газрын албан хаагчид зэрэг 14-68 насны 247 хүн дасгал хөдөлгөөнд хамрагджээ. Өглөө эрт босож дасгал хийснээр бие хөнгөрч, оюун ухаан саруулжиж, сэтгэл санаа сэргэж байгааг хүмүүс хэлж байв.

Мөн тус аяны хүрээнд аймгийн Соёл урлагийн газар, Биеийн тамир, спортын газар, Хөгжимт драмын театраас “Дасгалын жор” гаргасан байна. 16 тоот дасгалыг “Өвөрхангайн магтаал”-ын  аянд хийж буй уг “Дасгалын жор”-ыг ерөнхий боловсролын сургууль, цэцэрлэгийн хүүхдүүдэд зориулан гаргажээ.