Т.Аюурсайхан: Олон нийтийн мэдээлэлд үндэслэж надад зохиомол хэрэг үүсгэсэн

УИХ-ын гишүүн, ХНХ-ын сайд Т.Аюурсайханыг сайдын албан тушаалаас нь чөлөөллөө. 

Тэрбээр нүүрсний хэрэгт шалгагдаж байгаатай холбоотойгоор сайдаасаа чөлөөлөгдөх хүсэлтээ гаргасан юм. 

Уг асуудлыг хэлэлцэх үеэр УИХ-ын гишүүн Д.Ганбат ямар шалтгаанаар сайдын ажлаа өгч байгаа вэ гэдгийг тодрууллаа. 

УИХ-ын гишүүн Т.Аюурсайхан үүнд хариулахдаа тэрбээр "Миний бие сайдаас чөлөөлөгдөх хүсэлтээ Ерөнхий сайдад гаргаад чөлөөлөгдөж байна. Нөхцөл байдлыг та бүхэн сайн мэдэж байгаа. ХНХ-ын салбарт надаар даалгуулж хийлгүүлэх гол ажил хууль эрх зүйн реформ байсан. Ялангуяа Нийгмийн даатгалын хуулийн том шинэчлэл. 4-5 Засгийн газар дамнан яригдсан энэ хуулийн хэлэлцэх эсэхийг шийдүүлээд УИХ дээр хэлэлцэгдээд эхэлж байна. Энэ бол гол ажил байсан. Цаашид олон зүйлийг өөрчилж шинэчлэх тэмүүлэлтэйгээр энэ ажлыг хийгээд гурав орчим сар болсон.

Та бүхэн мэдэж байгаа, тодорхой хэрэгт намайг холбогдуулан нийгмийн сүлжээгээр миний эсрэг зохион  байгуулалттай гүтгэлэг, дайралт, доромжлол явуулсан. Үүнийг янз бүрийн хүмүүс зохион байгуулж, маш их хөрөнгө мөнгө гаргасан. Зах зухаасаа ил болж байгаа.  Олон нийтийн мэдээлэлд үндэслээд хуулийн байгууллагаас надад хэрэг үүсгэсэн. Энэ асуудлаар би удаа дараа мэдэгдэл хийж,  нүүрсний хулгайн хэрэгт би холбогдоогүй.  Надад хэрэг үүсгэсэн прокурорын дүгнэлттэй би санал нийлэхгүй байгаа.  Зохион байгуулалттай гэмт бүлэг байгуулах, бусдыг элсүүлэх гэдэг хэрэгт намайг холбогдуулсан. Терроизм, зэр зэвсэг, олон нийтийн аюулгүй байдлын эсрэг гэмт хэрэгт ямар ч баримт нотолгоогүй, зохион байгуулалттайгаар хэрэг үүсгэсэн. Өмнө нь зохиомол хэрэг гэж би сонсож байсан ч,  үзээгүй. Хуулийн үндэслэлгүй гэж үзэж би шат шатанд нь гомдол гаргаад явж байгаа" гэлээ.