Ж.Сандагсүрэн: Хүчтэй газар хөдлөлтөд гэр хорооллын байшингуудын 81 хувь нь нурах судалгаа гарсан

Барилгын чанар, аюулгүй байдал, стандарт, салбарын хяналтын тогтолцоо, хууль, эрх зүйн өнөөгийн байдал, цаашид хэрэгжүүлэх арга хэмжээг тодорхойлох зорилгоор “Барилгын чанар, аюулгүй байдал, стандарт” зөвлөгөөн нийт 70 гаруй байгууллагын 220 гаруй төлөөлөлтэйгээр зохион байгуулагдсан. 

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн "Өнгөрсөн хугацаанд бид эрсдлээс сэргийлэх ажлуудыг явуулж ирсэн ч Туркт болсон газар хөдлөлтийн гамшиг биднийг өөр түвшинд авчирч байна. Бидний болж байгаа гэж бодож ирсэн зарим арга хэмжээнүүдэд буруу хэрэгжсэн зүйл олон байна. Нийслэлд 30 мянга орчим барилга бий. 2002 оноос өмнө баригдсан 1800 орчим барилгад пассортжуулах ажил явагдаж байна. Гэтэл үүнээс 400 гаран барилга газар хөдлөлтөд тэсвэргүй гэсэн дүгнэлт гарсан. Тиймээс өндөр эрсдэлтэй барилгуудыг яаралтай нураах хэрэгтэй байна. Өнөөдөр ийм байдалтай байгаа нь авлига, албан тушаалтай холбоотой. Тиймээс бидэнд энэ бүгдийг хянаж шалгах нөхцөл байдал үүсч байна. Туркт газар хөдлөлтөд нурсан барилгууд дунд газар хөдлөлтөд тэсвэртэй гэж дүгнэгдсэн барилгууд байсан. Манайд мөн ийм барилгууд байгаа юм биш биз дээ гэдэг үүднээс түүврийн аргаар шалгалт явуулна" гэлээ.