Н.Анхбаяр: Би Д.Мөнх-Эрдэнийн талаар нэг ч удаа гомдол гаргаагүй, харин ч тэр хүн манай гэр бүлийг гүтгэж олонд танигдсан

Иргэн Д.Мөнх-Эрдэнэ цагдан хоригдож буй асуудалд ГХЯ-ны Төрийн нарийн бичгийн дарга Н.Анхбаяр ямар байр суурьтай байгааг тодрууллаа. 

Тэрбээр "Д.Мөнх-Эрдэнийн эрүүгийн хэрэг хянан шийдвэрлэх ажиллагаа надад огт хамаа байхгүй. Намайг гурав, дөрвөн жилийн хугацаанд хангалттай гүтгэн доромжилсон. Гэхдээ тэр хүний талаар нэг ч гомдол гаргаагүй. Тэр хүний намайг төрийн сургалтын сангаар сурсан гэдгээс бусад нь бүгд худал. Өөрөө л намайг гүтгэж доромжилж байгаа хүн. Ер нь гурав дөрвөн хүн л улс төрийн зорилгоор манай гэр бүл рүү дайрч байгаа ш дээ. Сонгууль дөхөхөөр л манай аав руу дайрдаг. Тэр хүн олон нийтэд өөрийгөө таниулахын тулд манай гэр бүл рүү дайрч сүүлдээ хүн болгон руу дайрдаг болсон. Та нар бод л доо. Хэн нэгэн хүн өөрийн чинь гэр бүл рүү дайраад байвал ямар байх уу. Тэгээд ч энэ хүн тооноор орж ирсэн, салбарын биш хүн, Хятдад хууль тогтоомж зөрчсөн, ажлын шаардлага хангахгүй байсан хүн. Энэ хүн өөрөө л энэ байдлыг бий болгосон" гэлээ.