Хөгжлийн бэрхшээлтэй эмэгтэйчүүдэд зориулсан “Хайрын бэлэг” арга хэмжээ боллоо

УИХ-ын гишүүн Э.Бат-Амгалангийн санаачилсан хөгжлийн бэрхшээлтэй эмэгтэйчүүдэд зориулсан “Хайрын бэлэг сургалт, өдөрлөг "Хүртээмжийг хүн бүрд" уриан дор болж өнгөрлөө. Эмэгтэйчүүдийн эрхийг хамгаалах өдрийг тохиолдуулан болсон уг арга хэмжээнд Баянзүрх дүүргийн 43 хорооны хөгжлийн бэрхшээлтэй иргэдийг төлөөлж 300 гаруй хүн оролцсон юм.

Баянзүрх дүүргийн хөгжлийн бэрхшээлтэй эмэгтэйчүүдийн нийгмийн оролцоог нэмэгдүүлэх,эрхийг таниулах зорилготойгоор “Хайрын бэлэг” арга хэмжээг зохион байгуулж буй талаар Баянзүрх дүүргийн Хөгжлийн бэрхшээлтэй иргэдийн зөвлөл, “Амжилтын Гэгээн Од” ТББ-ын тэргүүн Б.Мөнххишиг хэллээ.

Уг арга хэмжээнд Баянзүрх дүүргийн иргэдийн Төлөөлөгчдийн Хурлын дарга А.Баяр оролцож хөгжлийн бэрхшээлтэй иргэдэд чиглэсэн, хүртээмжийг нэмэгдүүлэх чиглэлээр дүүргийн хэмжээнд олон ажил хийхээр төлөвлөж байгааг дуулгасан юм.
“Өнөөдөр хүн бүхэн тэгш хүртээмжтэй нийгэмд амьдрах ёстой. Өнөөдөр баяртаа оролцохоор гэрээсээ ирэхэд бартаа саадгүй явдаг болгохын төлөө бид ажиллаж байна. Тэр ч үүднээсээ хоёр хороог сонгож жижиг хороо болгохоор ажлаа эхлүүлсэн нь цаашдаа 43 хороогоо жишиг болгон зохион байгуулах эхлэл болж байна” хэмээн тэрээр хэлээд мэндчилгээ дэвшүүлсэн юм.

“Хайрын бэлэг” арга хэмжээний үеэр дөрвөн иргэнд тэргэнцэр бэлэглэж, 150 гаруй азтан шалгаруулж дүүргийн аж ахуйн нэгжүүдийн ирүүлсэн бүтээгдэхүүн, үйлчилгээ дээжийг бэлэглэсэн нь туулай жилийн аз хийморийг бэлгэдэж буйг иргэд бэлэгшээлээ.

Арга хэмжээний үеэр нэгэн гэнэтийн бэлэг задарсан нь 23 дугаар хорооны хөгжлийн бэрхшээлтэй иргэнд оёдлын машин, хэрээсний машиныг бэлэглэсэн явдал байлаа. Тэрээр хэдийгээр хөгжлийн бэрхшээлтэй ч хувиараа оёдол хийж, ахуй амьдралаа залгуулдаг аж. Хорооны салбар зөвлөлийн даргадаа “Оёдлын машин, хэрээсний машинтай л болчихвол...” хэмээн ярьж байсан нь өнөөдөр биеллээ оллоо.

“Хайрын бэлэг” арга хэмжээ дуу хуур, бүжиг, бэлэг, хайраар дүүрэн болж өнгөрлөө хэмээн цугларсан иргэд талархлаа илэрхийллээ хэмээн Баянзүрх дүүргээс мэдээллээ.