Б.Жавхлан: Хүүхдийн мөнгийг хүүхэд бүрт олгох асуудлыг ЗГ дур мэдэн шийдэх боломжгүй

УИХ дахь МАН-ын бүлгээс хүүхдийн мөнгийг хүүхэд бүрт олгох чиглэлийг өчигдөр /2023.03.20/ Засгийн газарт өгсөн билээ. Энэ  оны төсөвт нийт хүүхдийн 91 хувьд нь хүүхдийн мөнгийг олгохоор 1.3 их наяд төгрөг төсөвлөсөн.

МАН-ын бүлгээс өгсөн дээрх чиглэлийг хүлээн авахад боломжтой эсэх талаар  Сангийн сайд Б.Жавхлангаас тодрууллаа Тэрбээр "2023 оны Төсвийн хууль хэрэгжээд нэгдүгээр улирал дуусах гэж байна. Нэгэнт УИХ-аас батлагдсан Төсвийн тухай хуулийн хүрээнд л Засгийн газар үйл ажиллагаагаа явуулдаг. Хуульд өөрчлөлт оруулах эсэх нь асуудал нь зөвхөн УИХ дээр яригдана. Түүнээс биш Засгийн газар дур мэдэж өөрчлөлт оруулдаг эрх зүйн боломж бидэнд байхгүй" гэлээ.