Ах дүүсийн хайр: "Дүү маань жаахан дүрсгүй, гэртээ бол дарга шиг л байдаг"

Жүжигчин Б.Баттөмөрийн найруулсан "Трио" киноны гол дүрд 130 дугаар сургуулийн тэгш хамруулах ангийн сурагч Т.Тэлмүүн тоглосон. Энэхүү кино нь дауны хам шинжтэй хүмүүсийн эрхийг хамгаалах, эрх тэгш хүртээмжтэй нийгмийг цогцлоохыг уриалсан бүтээл юм. Киноны гол дүрд тоглосон 130 дугаар сургуулийн тэгш хамруулах ангийн сурагч Т.Тэлмүүн зарим үед л юм ярьдаг бөгөөд дүүгийнхээ талаар Т.Тэргэл бидэнтэй ярилцлаа. 

Ярилцлага эхлэхын өмнө Т.Тэлмүүн уурлахад ах Т.Тэргэл нь "энэ яриаг өгчихөөд ах нь чипс, ундаа авч өгөөд, хоёулаа харья за" хэмээн чихэнд нь шивнээд үнсэв.

"Манай дүүг Тулгын Тэлмүүн, харин намайг Тулгын Тэргэл гэдэг. Т.Тэлмүүн 2009 онд төрсөн. Бид хоёр 9 насны зөрүүтэй, дүү маань төрсөн цагаасаа эхлээд л хайр цацруулсан хүүхэд байсан. Манай дүү ер нь бага зэрэг сахилгагүй. Гэртээ зарим үед дүрсгүй шүү дээ. Олон хүнтэй газраар явахаар ичээд, сандраад байдаг юм. Саяхан дүр бүтээсэн "Трио" киноныхоо талаар их ярина. Гэртээ орж ирэнгүүтээ Youtube ороод киноны хэсгээ гаргаад "одоо би гарах гэж байна" гээд л заагаад өөрийнхөө тоглосон хэсгүүдийг цээжилчихсэн байна лээ. Манай урд дэлгүүрийн охин Т.Тэлмүүнийг харчихаад "энэ нөгөө кинонд тоглосон хүүхэд мөн үү" гээд асууж байсан. Дүүгээрээ тэр үед бахархах мэдрэмж төрсөн. Т.Тэлмүүн уурыг нь хөдөлгөхгүй л бол ихэнх үед аз жаргалтай байдаг нь гоё санагддаг. Сургуульдаа яваад л хичээл номоо хийхээрээ намайг бас ээжийг зурна. Зураг зураад, юм будах дуртай. Т.Тэлмүүн хааяа нэг ярина, тэр үедээ "ундаа, чипс авч ир" гээд л намайг зарна шүү дээ. Манай гэрийн босс болохоор ундаа чипсийг нь авч өгнө. Дауны хам шинжтэй хүмүүсийг найзууд маань сайн мэддэг болохоор дүүд маань их хайртай"...

Бичлэгээр үзэх: