Д.Амарбаясгалан: Яам дур мэдэн хүүхдийг мэдээллээс хасах боломжгүй

Хүүхдийн мөнгөний алдааг засах ажил ямар байгаа талаар ЗГХЭГ-ын дарга Д.Амарбаясгалангаас тодрууллаа. 

Тэрбээр  "Хүүхдийн мөнгөний зөрчлийг арилгах ажлын хэсэг ажлаа хийгээд явж байна. Иргэдээс ирсэн санал хүсэлт, гомдлын дагуу анхан шатны нэгж дээр мэдээллийг засаж сайжруулах ажлыг эрчимтэй хийж байна. Үндсэндээ албан байгууллагуудад байсан мэдээллийн зөрүү ихээхэн арилж байна, тодорхой хэмжээний цаг хугацаа авна. Нэгдсэн нэг мэдээлэлтэй болсны дараа алдаа нь бүрэн арилна.

Бидэнд ирсэн 3500 орчим хүүхдийн мэдээлэл байна. Жишээ нь, нэгдүгээр сардаа мөнгө аваад, хоёр, гуравдугаар сардаа авч чадаагүй гэх мэдээлэл байна. Иргэд анхан шатны байгууллагуудад очиж өөрсдийн үл хөдлөх болон бусад төрлийн мэдээллийг өөрчилж, шинэчлэх ажилд идэвхтэй оролцох ёстой. 

Энэ ажил идэвхтэй явж байгааг УБЕГ, хөдөлмөр халамж үйлчилгээний газар, анхан шатны нэгжээс мэдээлэл ирж байна. Хүндрэл үүсгэхгүйгээр мэдээллийг шинэчлэх ажлыг холбогдох яам тамгын газрууд ажиллаж байна. Сум, хороо зэрэг харъяалагдах газраа мэдээллээ шинэчлүүлэх шаардлагатай. Түүнээс биш яам дур мэдэн хүүхдийг мэдээллээс хасах боломж байхгүй" гэлээ.