Хүүгийн төрсөн аав: Хүүгээ л ухаан оруулмаар байна, ээж нь тэр залуутай хамт хоригдож байгаа

2023 оны гуравдугаар сарын 6-7-нд шилжих шөнө Баянгол дүүргийн 10 дугаар хорооны нутаг дэвсгэрт байрлах хотхоны дугаар тоотод гурван настай, эрэгтэй Б нь бусдад зодуулан гуравдугаар сарын 8-ны 09:40 цагийн орчимд ГССҮТ-д ухаангүй байдалтай ирж, одоогоор эрчимт эмчилгээний тасагт хэвтэн эмчлүүлж байна.

Шалгалтын явцад Л-ийн хамтран амьдрагч Э нь 3-6 насны хүүхдүүдийг гэртээ харж үлдэхдээ гурван настай Б-г зодсон байж болзошгүй байдал урьдчилсан байдлаар тогтоогдсон талаар Цагдаагийн байгууллагаас мэдээлсэн. 

Бид хүүгийн төрсөн аавтай цөөн хором ярилцлаа. 

Тэрбээр "Хүүгийн маань бие муу хэвээр л байна. Би хөдөө орон нутагт ажил хийдэг. Ээж нь хүүгийнхээ хэргийг нуун дарагдуулсан нь үнэн. Намайг хөдөө байхад хуучин хадам ээж над руу ярьж мэдэгдсэн. Мэдсэн даруйдаа хотод ирлээ. Би хоёр хүүтэй, ах нь зургаан настай. Нарийн тодорхой мэдээллийг Цагдаагийн байгууллага өгөх байх. Хэрэг бол тодорхой байгаа. Хүүгээ хурдан босгож авмаар байна, эмнэлгийн байгууллага ч хичээж байна. Том хүүгээ би өөр дээрээ авчихсан. Ээж нь мөн хоригдсон байгаа" гэлээ.