Франц хэлтнүүдийн соёлын өдрүүд маргааш эхэлнэ

Жил бүрийн гуравдугаар сарын 20-нд тохиодог Олон улсын Франц хэлтнүүдийн өдөр Fête de la Francophonie буюу Франц хэлтнүүдийн баярыг 24 дэх жилдээ зохион байгуулах гэж байна. Тодруулбал, маргаашаас баярыг тэмдэглэж эхлэх юм байна.

Гуравдугаар сарын 10, 11-нд Франц, Канад, Кибек киног монгол хадмалтайгаар “Тэнгис” кино театрын дэлгэцнээ үнэ төлбөргүй гаргах бол гуравдугаар сарын 11-нээс 25-нд ерөнхий боловсролын сургууль, их, дээд сургуульд суралцагчдын дунд франц хэлний шүлэг, дууны тэмцээн зохион байгуулахаар болжээ. Уг тэмцээнийг хүүхэд, өсвөр нас, насанд хүрэгчид гэсэн гурван ангиллаар зохион байгуулах юм байна.

Энэхүү үйл ажиллагаа нь Монгол дахь нийт франц хэлтэн, соёлын төлөөллүүд, Монгол улсад суугаа Элчин сайдын яамдууд, сургалт судалгааны байгууллагууд, францын бизнес худалдаа, аялал жуулчлалын байгууллагуудыг нэгтгэдэгээрээ онцлог бөгөөд Франц хэлтнүүдийн баярын хүрээнд олон төрлийн соёлын үйл ажиллагаанууд зохион байгуулагдах бөгөөд франц хэлээр ярьдаг улс орнууд, тэдний соёлыг Улаанбаатар хотод сурталчлан таниулах зорилготой аж.

Харин гуравдугаар сарын 18-нд франц хоол танилцуулах арга хэмжээ болно. Элчин сайд нар өөрсдийн орны нэрийн хоолыг танилцуулж, хэрхэн хоол хийх талаар сонирхуулахын зэрэгцээ "Voilà" рестораны ахлах тогоочийн заавраар амтат жороос суралцах боломжтой аж.

Түүнчлэн гуравдугаар сарын 25-нд франц хэлтнүүдийн баярын ялагчдыг тодруулах бол гуравдугаар сарын 26-нд "Франц хэлтэн орнуудын хотхон" өдөрлөгийг Сүхбаатарын талбайд нээлттэй зохион байгуулахаар болжээ. Энэ үеэр дипломат байгууллага, боловсрол соёлын төвүүд, бизнес худалдаа, аялал жуулчлалын компани зэрэг 40 гаруй байгууллага олон нийтэд өөрсдийн үйл ажиллагааг танилцуулж, мэдээлэл өгөх юм байна.